काठमाडाैं, जेठ ३२
नेपाली कांग्रेसका सांसद राजेन्द्र बजगाईंले सिंहदरबारमा बन्दै गरेको नयाँ संसद् भवनमा मदिरा पिउने बार बनाउन ध्यानाकर्षण गराएका छन् ।
शुक्रवार प्रतिनिधि सभा बैठकमा विनियोजन विधेयकअन्तर्गत संस्कृति पर्यटन तथा नागरिक उड्डयन मन्त्रालयमाथि खर्च कटौती प्रस्ताव पेश गर्दै कांग्रेस सांसद बजगाईंले विदेशी पाहुना आउँदा सोसलाइजेसनका लागि बार बनाउनेतर्फ सभामुखको ध्यानाकर्षण गराएका हुन् ।
संसद् भवनमा बार बनाउनु पर्यटकीय हिसाबले महत्वपूर्ण रहेको सांसद बजगाईंले बताएका छन्। अमेरिकाको सिनेट र बेलायतको विश्वविद्यालयको क्यान्टिनमा मदिरा पिउने बार रहेको दाबीसहित उनले संसद् भवनमा बार राख्न प्रस्ताव गरेका हुन् ।
लण्डर स्कुल अफ इकोनमिक्सको क्यान्टिनमा बार रहेछ,’ सांसद बजगाईंले भने, ‘सम्माननीय सभामुख महोदय बन्दै गरेको संसद् भवनभित्र विदेशी पाहुना आउदा सोसेलाइजेन गर्ने बार निर्माण गर्ने हो कि ? यसमा ध्यानाकृष्ट गर्न चाहन्छु ? यो पर्यटकीय हिसाबले महत्वपूर्ण छ ।
सांसद बजगाई पर्यटन व्यवसायी पनि हुन् ।
