नेविसंघ र अनेरास्ववियु पछिल्लो समय विज्ञप्तिमार्फत एक अर्कामाथि आरोप थोपरिरहेका छन् । एक हिसाबले भनौैं उनीहरु अहिले ‘विज्ञप्ति वार’ गरिरहेका छन् ।

के भन्छ अनेरास्ववियु ?
अनेरास्ववियुले नेविसंघका विद्यार्थीहरु फलामे रड, पेट्रोल बम, इट्टा, ढुंगा, चेन बोकेर अनेरास्ववियुका विद्यार्थीहरुमाथि एक्कासि आक्रमण गर्न आएपछि आत्मरक्षा गर्न प्रतिवाद गरेको बताएको छ । होस्टलमा आक्रमण गर्न आएपछि आफूहरु होस्टल भवनको ढोका बन्द गरेर बसेको र ढोका बन्दा गर्दा पनि नेविसंघले घरेलु हतियार र पेट्रोल बम प्रहार गरेको, आफूहरु बस्ने होस्टल तोडफोड गरेको र आगजनी गर्न खाजेपछि त्यसको प्रतिवादमा अनेरास्ववियुका विद्यार्थीहरु पनि लडाईमा उत्रिएको अनेरास्ववियुको भनाइ छ । उक्त समयमा अनेरास्ववियुका विद्यार्थीमाथि नेविसंघले आक्रमण गर्न खोज्दा आत्मघातीरुपमा नेविसंघकै विद्यार्थीलाई चोट लागेको कुरा अनेरास्ववियु केन्द्रीय क्याम्पस कमिटी कृषि तथा वन विज्ञान विश्वविद्यालयद्वारा जारी विज्ञप्तिमा भनिएको छ । त्यसक्रममा दोहोर भिडन्त हुँदा अनेरास्ववियुका साथीहरु पनि घाइते हुन पुगेको अनेरास्ववियुको भनाइ छ ।

घटनाको भोलिपल्ट होस्टल खाली गराएर विद्यार्थीलाई सुरक्षिता स्थानमा लैजाने भन्दै प्रशासनले गाडीमा हालेर लगेको र त्यसमध्येका अनेरास्ववियुका ३ विद्यार्थीलाई प्रहरी हिरासत पुराएको र आफूहरु बस्ने होस्टल खाली भएपछि होस्टलबाट नेविसंघका विद्यार्थीले ८ वटा ल्यापटपसहित विभिन्न सामग्री चोरेको आरोप अनेरास्ववियुले लगाएको छ ।

पक्राउ गरिएका ३ जनाको कुटपिटमा कुनै संलग्न नरहेकाले तत्काल रिहाई गर्न अनेरास्ववियुले माग गरेको छ । निर्दाेष विद्यार्थीलाई रिहाई गरी दोषी विद्यार्थीलाई कारबाही गर्न अनेरास्ववियुको माग छ ।

के भन्छ नेविसंघ ?
नेविसंघले उक्त घटनालाई दुई पक्षबीचको झड्पका रुपमा उल्लेख गरेको छैन । अनेरास्ववियुमा आवद्ध विद्यार्थीहरुले नेविसंघमा आवद्ध ६ जना विद्यार्थीलाई नियन्त्रण लिएर कुटपिट गरी आफ्नो छात्राबास भवनमा लगि ज्यान मार्ने उद्देश्यले बन्धक बनाएर राखेको र ती बन्धक बनाइएका साथीहरुलाई छुटाउन उक्त छात्राबास अगाडि जम्मा भएका नेविसंघका विद्यार्थीहरुलाई अनेरास्ववियुका विद्यार्थीले छात्रावासको छाना र पर्खाल भत्काएर ढुंगामुढा गर्न सुरु गरेको नेविसंघको भनाइ छ । उक्त घटना अनेरास्ववियुले एकपक्षीयरुपमा आफैले घटाएको नेविसंघ कृषि तथा वन विज्ञान विश्वविद्यालय रामपुर इकाई चितवनद्वारा जारी विज्ञप्तिमा उल्लेख छ ।

उक्त घटना घटाउने दोषीहरुलाई मात्र कारबाही गरियोस् भन्ने हेतुले सम्बन्धित नियकायमा नेविसंघले अनुरोध गरेको जनाएको छ । घटना घटाउने दोषीलाई कारवाही हुनेमा आश्वस्त रहेको कुरा पनि नेविसंघले विज्ञप्तिमा उल्लेख गरेको छ ।

ल्याप्टप चोरेको भनि अनेरास्ववियुले लगाएको आरोपलाई खण्डन गर्दै नेविसंघले चोरीको लान्छाना लगाउनु खेदजनकमात्र नभई लाज पनि लजाउने तुच्छ स्तरको विकृत मनोभावना भएको भनि जवाफ फर्काएको छ ।

के डीन र प्राध्यापक हुन् त प्रमुख दोषी ?
दुबै संगठनको विज्ञप्तिलाई नियाल्ने हो भने घटनाको प्रमुख दोषी तथा योजनाकार प्राध्यापक र डीनलाई देखाएको देखिन्छ ।
उनीहरुको विज्ञप्ति हेर्दा रामपुरमा विद्यार्थी लडाउन डीन र प्राध्यापकले नै उक्साउने गर्छन् । प्राध्यापकहरु आफ्नो मनमुटाव र झगडालाई विद्यार्थी झड्पमार्फत प्रस्तुत गर्न खोज्ने गरेको चित्रण दुबैको विज्ञप्तिमा गरिएको छ ।

राम्रो ज्ञान र असल शिक्षा दिन खटिएका प्राध्यापकहरु विद्यार्थीहलाई जुधाउनतर्फ उक्साएका छन् भनेर विद्यार्थीले नै भनिरहनु गम्भीर विषय हो । यसतर्फ पनि सम्बद्ध निकायहरुले निष्पक्ष छानबिन गर्नुपर्ने देखिन्छ ।

घटनामा विद्यार्थी घाइते गराउन विद्यार्थी नै प्रत्यक्ष दोषी भए पनि घटना घटाउन भने प्राध्यापक र कृषि संकायका डीन मुख्य दोषी रहेको कुरा विद्यार्थीले विज्ञप्ति मार्फत नै खोलिदिएका हुन् ।

अनेरास्ववियुले विश्वविद्यालयमा पदाधिकारीहरु परिवर्तन हुने समय नजिकएसँगै व्यक्तिगत राजनीतिक पक्षपोषण गर्ने हेतुले हारको मानसिकता बोकेका कृषि संकायको डीनको प्रत्यक्ष संरक्षणमा रहेको नेविसंघ अराजक व्यक्तिहरुको आडमा अनेरास्ववियुका साथीहरुमा माथि सांघातिक आक्रमण गर्न आएपछि विवाद उत्पन्न भएको जनाएको छ । डीनको संलग्नतामा सुनुयोजित ढंगले नेविसंघ आफूहरुमाथि सांघातिक हमला नै गर्ने गरी हतियार बोकेर आएको अनेरास्ववियुको भनाइ छ ।

त्यसैगरी अनेरास्ववियुले आफ्ना साथीहरुलाई किटानी जाहेरी गरी पक्राउ गराउनुलाई प्राध्यापकको राजनीतिक कुर्सीको चलखेल हो भनेर भनेको छ ।

नेविसंघले राज्य सत्ता, छात्रावास प्रशासन र आफू निकट प्राध्यापकहरुको प्रत्यक्षण संरक्षण र निर्देशनमा हतियार बोकेर आई अनेरास्ववियुले नेविसंघमा आवद्ध विद्यार्थीहरुलाई कुटपिट गर्दै लगेर ज्यान मार्ने उद्देश्यका साथ बन्धक बनाएको बताएको छ ।

प्रहरी र छात्रावास प्रशासनको उपस्थितिमै षड्यन्त्रपूर्वक अनेरास्ववियुले उक्त घटना घटाएको नेविसंघको भनाइ छ ।

अन्तत :
दुबै संगठनको विज्ञप्ति र विज्ञप्तिमा उल्लेखित भाषाहरुका आधारमा भन्दा रामपुर घटना एउटा संयोग र क्षणिक आवेग तथा विद्यार्थी साथीबीचको मनमुटावमा घटेको घटना जस्तो देखिँदैन । विज्ञप्तिलाई नियाल्ने हो भने यो त राजनैतिक स्वार्थ, प्राध्यापकहरुको कुर्सीको लडाईं, प्रशासनले आफू अनुकुल विद्यार्थी संगठनलाई प्रयोग गर्ने गरेको र त्यसको उपजको घटना भएको बुझिन्छ । तसर्थ यो घटना रामपुरमा पुनः नदोहोरिएला भन्न सकिन्न । यसतर्फ विद्यार्थी संगठन, संगठनका संरक्षक मानिएका राजनैतिक दल, विश्वविद्यालय प्रशासन र प्राध्यापकहरु अझ सचेत हुनुपर्ने देखिन्छ ।

यी दुई संगठनबीचको घातक द्वन्द्व अझै समाधान हुन सकेको छैन । आफूहरुले न्याय पाउनुपर्ने भन्दै नेविसंघले विश्वविद्यालयमा तालाबन्दी गरेको छ । जसका कारण विश्वविद्यालयमा पठपाठन ठप्प भएको छ । विद्यार्थीहरु त्रसित बनेका छन् । त्यही विषयमा पुनः झडप हुन सक्ने डरले विद्यार्थीहरु अझै पनि त्रासमै रहेको बुझिएको छ ।

त्रसित भएकै कारण विद्यार्थीहरुले अनलाइन कक्षा सञ्चालन गर्न माग गरेको छन् । तर यसतर्फ विश्वविद्यालय प्रशासनले चासो नदेखाएको विद्यार्थीहरुमार्फत बुझिएको छ ।

यस विषयमा थप फलोअपसहितको अर्काे लेख हामी पुनः प्रकाशन गर्ने छौं । विश्वविद्यालयका प्राध्यापक, डीन र प्रशासनका कुरासहित हामी अर्काे श्रृङ्खला तयार पार्ने छौं । चितवन आज डटकमसँगै रहनु होला ।

हेरौं, अनेरास्ववियुको विज्ञप्ति :

हेरौं, नेविसंघको विज्ञप्ति :