इस्लामावाद, पुस ६ –
पाकिस्तानको उत्तरपश्चिमी खैबर पख्तुनख्वा प्रान्तमा शनिबार बिहान भएको आतंकवादी आक्रमणमा १६ सैनिकको मृत्यु भएको छ । आठजना घाइते छन् ।
प्रान्तको दक्षिणी वजिरिस्तान जिल्लामा स्थानीय समयानुसार बिहान २ः३० बजे आक्रमण सुरु भएको थियो । त्यहाँ एउटा चेकपोस्टलाई निसाना बनाइएको थियो ।
१२ जनाको शव सनाखत गरिएको छ । चारजनाको पहिचान हुन बाँकी छ । स्रोतका अनुसार, घाइतेलाई तुरुन्तै अर्धसैनिक बलको फ्रन्टियर कोर ट्रेनिङ सेन्टरमा उपचारका निम्ति लगिएको थियो ।
सेनाले रकेट लन्चर र अरू उपलब्ध हतियार प्रयोग गरेर आक्रमणको प्रभावकारी रूपमा जवाफ दिएको थियो । पाकिस्तानी सेनाले आक्रमणकारीका बारेमा आधिकारिक बयान जारी गरेको छैन । – रासस
