प्रहरी गाँजा र अफिम खेती फँडानी गरेर फर्कने गरेको । अहिलेसम्म खेती गर्नेहरुलाई पक्राउ गरी कारबाही नगरिएको डीएसपी खनालले जानकारी दिए ।

जिल्ला प्रहरी कर्यालय चितवनका प्रमुख एसपी गोबिन्द पुरीले स्थानीयले ऐलानी जग्गामा गाँजा र अफिम खेती लगाउने भएकाले कसले लगायो भनेर पहिचान गर्न गाह्रो हुने गरेको बताए । उनी भन्छन्, ‘फँडानी गर्ने बेलामा कोही स्थानीय भेटिँदैनन् । प्रहरीको टोली जान्छ अनि गाँजा अफिम खेती देखेपछि फँडानी गरेर फर्कन्छ ।’ फँडानी गर्ने क्रममा अहिलेसम्म स्थानीयबाट प्रतिवाद नभएको उनले बताए ।

कुन व्यक्तिले लगाएको हो भन्ने पहिचान र प्रमाणित भयो भने मात्र कारबाही गर्न सकिने उनले बताए । यदि खेती गर्ने व्यक्ति फालानो हो भनेर प्रमाणित भएमा लागुऔषध उत्पादन, प्रयोग र ओसापसार सम्बन्धी ऐन अुनसार नै कारबाही हुने एसपी पुरीले बताए ।

प्रहरीले गस्ती र स्थानीयको सूचनाका आधारमा गाँजा र अफिम खेती गरिएको स्थानको पहिचान गर्ने गरेको छ । गाँजा र अफिम खेती नगर्न सचेतना जगाउने कार्यक्रम समेत गर्ने गरिएको उनले जानकारी दिए ।

यस वर्ष गाँजा खेती विगतको तुलनामा निकै न्यून देखिएको छ भने अफिम खेती भने बढेको देखिन्छ । वर्षेनी प्रहरीले फँडानी गर्ने र सचेतना जगाउने गरेका कारण गाँजा खेती घटेको एसपी पुरीले बताए । गाँजा खेती घट्दै जानु राम्रो भयो । तर स्थानीयले अफिम खेती भने बढाएका छन् । गाँजा छाडेर अफिम खेती किन बढाउन थाले यसतर्फ प्रहरीले चनाखो भएर ध्यान दिन जरुरी देखिन्छ ।