– हिरालाल आचार्य ‘डायमण्ड’
चितवन, बैशाख १७ –
चितवनमा पछिल्लो ९ महिनामा २६ जना महिला बलात्कृृत भएका छन् । जिल्ला प्रहरी कार्यालय चितवनका सूचना अधिकारी एवम् प्रहरी नायव उपरीक्षक -डीएसपी) रविन्द्र खनालका अनुसार चालु आर्थिक वर्ष २०८२/०८३ को चैत्रसम्ममा २६ वटा जबरजस्ती करणी -बलात्कार) का मुद्दा दर्ता भएका हुन् ।
गत आव २०८१/०८२ मा कुल ५१, आव २०८०/०८१ मा कुल ५३, २०७९/०८० मा कुल ६१ र २०७८/७९ मा कुल ६३ वटा बलात्कारका मुद्दा दर्ता भएका थिए ।
जिल्लामा चालु आर्थिक वर्षको ९ महिनामा जवरजस्ती करणी उद्योग -बलात्कार प्रयास) का ३ वटा मुद्दा दर्ता भएका छन् । गत आव २०८१/०८२ मा कुल ८, आव २०८०/०८१ मा कुल ७, २०७९/०८० मा कुल १६ र २०७८/७९ मा कुल ११ वटा मुद्दा दर्ता भएका थिए ।
यस आवको ९ महिनामा बालयौन दुराचारका ५ वटा मुद्दा दर्ता भएका छन् । गत आव २०८१/०८२ मा कुल १०, आव २०८०/०८१ मा कुल २९, २०७९/०८० मा कुल ३० र २०७८/७९ मा कुल १७ वटा मुद्दा दर्ता भएका थिए ।
यस आवको ९ महिनामा अप्राकृतिक मैथुनका कुनै पनि मुद्दा परेका छैनन् । आव २०८०/०८१ मा १, आव २०७९/०८० मा २ वटा मुद्दा परेका थिए । माथिका तथ्यांकहरुका आधारमा भन्दा समग्रमा यौनजन्य हिंसा केहीमात्रामा घट्दै आएको देखिन्छ ।
त्यसैगरी यस आवको ९ महिनामा बहु बिबाहका ५ वटा मुद्दा दर्ता भएका छन् । गत आव २०८१/०८२ मा कुल ५, आव २०८०/०८१ मा कुल १४, २०७९/०८० मा कुल २६ र २०७८/७९ मा कुल १९ वटा मुद्दा दर्ता भएका थिए । पछिल्लो ३ वर्षदेखि बहु बिबाहका घटनामा पनि कमी आउँदै गएको देख्न सकिन्छ ।
डीएसपी खनालका अनुसार यौनजन्य हिंसाका घटनामा प्रहरीले अभियुक्तलाई पक्राउ गरेर कानुनी कारबाहीका लागि मुद्दालाई अदालतसम्म लाने गर्दछ । अदालतले घटनाको प्रकृति र प्रमाणका आधारमा मुद्दालाई फैसला गर्ने गर्दछ ।
अधिकांश यौजनजन्य हिंसाहरु आफन्त, छिमेकी र साथीसंगी अर्थात् चिनेजानेकै व्यक्तिबाट हुने गरेको पाइएको डीएसपी खनाल बताउँछन् । बालिकाहरु धेरै उमेर पुगेका व्यक्तिबाट यौनजन्य हिंसामा परेको देखिन्छ भने अन्यको हकमा एउटै उमेर समूहका व्यक्तिबाट हिंसामा पर्ने गरेको देखिन्छ ।
डीएसपी खनालका अनुसार पछिल्लो समय समाजमा सचेतना बढ्दै गएका कारण पनि बलात्कारका घटना बाहिर आउन थालेका छन् । घटनालाई गोप्य राखिने वा भित्रभित्रै मिलाउने प्रवृत्ति बन्द हुँदै गएको छ । यस्तै पछिल्लो समय प्रहरीको सक्रियता बढ्दै गएकाले पनि बलात्कारका घटनालाई बाहिर ल्याउन सकिएको डीएपी खनाल बताउँछन् ।
प्रचलित कानुन अनुसार १८ वर्षभन्दा कम उमेरका केटीसँग सहमतिमा, प्रेम सम्बन्ध भएर वा विवाह नै गरेर भए पनि यदि शारीरिक सम्बन्ध राखिएको छ भने त्यो पनि बलात्कार हुन्छ । यस्तै विवाह गरिसकेपश्चात पनि श्रीमतीको सहमतिबिना श्रीमान्ले सम्भोग गरेमा त्यो पनि बलात्कार हुन्छ । यदि त्यस्तो भएको प्रमाणित भएमा प्रहरीले जबरजस्ती करणीमा मुद्दा दर्ता गरेर कानुनी प्रक्रिया अगाडि बढाउने गर्दछ ।
