चितवन, फागुन ९ –
भरतपुरको न्यु होराइजन इङ्ग्लिस स्कुलद्वारा आयोजित अन्तर स्कुल गायन (सिङ्गिङ्) प्रतियोगिता सम्पन्न भएको छ ।
प्रतियोगितामा भाल्मिकी शिक्षा सदनकी अर्पना केसी प्रथम, अर्किड स्कुलका सोभित शाह दोश्रो र ग्रिन ल्याण्डका करण विक तेश्रो बनेका छन् ।
प्रथम हुनेलाई गितार, दोश्रो र तेश्रो हुनेलाई ट्रफीसहित प्रमाणपत्र पुरस्कार स्वरुप प्रदान गरिएको कार्यक्रम संयोजक रिन्जु कुमारी भट्टराईले जानकारी दिइन् । उनका अनुसार प्रतियोगितामा १८ स्कुलबाट कक्षा ६ देखि १० सम्मका २९ विद्यार्थीले भाग लिएका थिए । प्रतियोगितामा सहभागिहरुलाई निशुल्क दर्ता गराइएको थियो ।
प्रतियोगितामा गायक तथा संगितकार भुवन प्यासी र गायक बिनोद गुरुङ्ग निर्णायक मण्डलका रुपमा रहेका थिए ।
विद्यार्थीहरुलाई अतिरिक्त क्रियाकलापमा पनि अगाडि बढाउनुपर्छ भनेर न्यु होराइजनले गायन प्रतियोगिता राखेको विद्यालयका अध्यक्ष श्रीधर घिमिरेले बताए । विद्यार्थीहरुका अतिरिक्त प्रतिभाहरु प्रस्फुटन गर्न न्यु होराइजनले अतिरिक्त कक्षाहरु समेत सञ्चालन गर्दे आइरहेको उनले बताए ।
कार्यक्रमको पूरा भिडियो हेर्नुहोस् :
प्रतियोगिताको उद्घाटन कार्यक्रममा भरतपुर महानगरपालिका वडा नम्बर २ का अध्यक्ष मनोज रानाभाट, प्याब्सन भरतपुर महानगरपालिकाका सचिव बेदराज न्यौपाने, सल्लाहकार भानुभक्त अर्याल लगायतको उपस्थिति रहेको थियो । विद्यालय व्यवस्थापन समितिका अध्यक्ष श्रीधर घिमिरेको अध्यक्षतामा सम्पन्न कार्यक्रममा प्राचार्य बसन्त रानाभाटले स्वागत मन्तव्य राखेका थिए भने समिर पौडेलले सञ्चालन गरेका थिए ।
भरतपुर २ क्षेत्रपुरमा रहेको न्यु होराइजन स्कुलले यसै वर्ष आइएसओ लोगो प्राप्त गरेको छ । प्ले ग्रुपदेखि कक्षा १० सम्म अध्यापन गराउँदै आइरहेको न्यु होराइजनमा हाल ७०० विद्यार्थी अध्ययनरत छन् । वि.सं. २०५५ सालमा स्थापना भएको न्युज होराइजनले छोटो समयमा शैक्षिक र अतिरिक्त क्रियाकलापमा गरेको प्रगतिको चर्चा हुने गरेको छ ।
