काठमाडाैं माघ १०
दक्षिण अफ्रिकामा जारी आईसीसी यू-१९ पुरुष क्रिकेट विश्वकपको आफ्नो दोस्रो खेलमा नेपालले आज (बुधबार) पाकिस्तानसँग खेल्दैछ । समूह ‘डी’ मा रहेका नेपाल र पाकिस्तानबीचको खेल इस्ट लन्डनस्थित बफ्यालो पार्कमा नेपाली समयानुसार दिउँसो १:४५ बजेबाट शुरू हुनेछ ।
यसअघि पहिलो खेलमा नेपाल न्यूजिल्यान्डसँग पराजित भएको थियो भने पाकिस्तानले अफगानिस्तानमाथि सानदार जीत हात पारेको थियो ।
यू-१९ क्रिकेट विश्वकपमा नेपाल र पाकिस्तानबीच तीन पटक खेल भएका छन् । तीमध्ये एक खेल पूरा हुन सकेन भने एक खेलमा नेपाल तथा एक खेलमा पाकिस्तानले जीत हात पारेको इतिहास छ ।
सन् २००० मा श्रीलंकामा भएको यू-१९ विश्वकपमा नेपाल र पाकिस्तानबीचको खेल पूरा हुन सकेको थिएन ।
सन् २००२ मा नेपाल र पाकिस्तानबीच पुनः विश्वकपमा भेट भएको थियो । न्यूजिल्यान्डमा भएको विश्वकपमा भने नेपालले समूह चरणमै पाकिस्तानलाई ३० रनले पराजित गरेको थियो ।
तर, सन् २०१६ मा बंगलादेशमा भएको विश्वकपअन्तर्गत पाँचौँ स्थानका लागि भएको प्लेअफ सेमिफाइनलमा पाकिस्तानले नेपाललाई १२२ रनको फराकिलो अन्तरले पराजित गरेको थियो ।
त्यसयता गत डिसेम्बर मै युनाइटेड अरब इमिरेट्स (यूएई) मा भएको एसीसी यू-१९ एसिया कपको समूह चरणमा पाकिस्तानले नेपाललाई ७ विकेटले पराजित गरेको थियो ।
यसैबीच, न्युजिल्यान्डले अफगानिस्तानमाथि १ विकेटको रोमाञ्चक जीत हात पारेसँगै नेपाललाई फाइदा हुने भएको छ । लगातार दोस्रो जीतसँगै न्युजिल्यान्ड सुपर सिक्समा पुग्ने पहिलो टोली बनेको छ ।
पहिलो खेलमा न्युजिल्यान्डले नेपाललाई हराएको थियो । न्युजिल्यान्डको लगातारको जीतले नेपाललाई फाइदा पुग्ने भएको छ ।
नेपाल सुपर सिक्समा पुग्न नेपालले अन्तिम खेलमा अफगानिस्तानलाई हराए पर्याप्त हुनेछ । न्युजिल्यान्डसँग अफगानिस्तान पराजित भएपछि नेपालले अन्तिम खेलमा मात्र जीत हात पारे पनि सुपर सिक्समा पुग्ने समीकरण तयार भएको हो ।
अफगानिस्तान पहिलो खेलमा पाकिस्तानसँग १८१ रनले पराजित भएको थियो ।
