३ माघ,नवलपुर-
WAY ग्रुप नेपाल नवलपुरले नारायणी नदीको संरक्षण र स्वच्छताका लागि सरसफाइ तथा सचेतना अभियान सुरु गरेको छ। पवित्र नारायणी नदीलाई स्वच्छ र सफा राख्ने उद्देश्यका साथ अभियानलाई नियमित कार्यक्रमका रूपमा अघि बढाइएको हो।
गैंडाकोट नगरपालिका–१ स्थित ब्रिटिश क्याम्प साथीको सम्झना पार्कबाट सुरु गरिएको उक्त अभियान अब हरेक शनिबार निरन्तर सञ्चालन गरिने WAY ग्रुप नवलपुरका सचिव सबिन कँडेलले जानकारी दिनुभयो।
अभियान सञ्चालनमा गैंडाकोट नगरपालिका, सम्बन्धित वडा कार्यालय, इलाका प्रहरी कार्यालय गैंडाकोट, ट्राफिक प्रहरी गैडाकोट, नगर प्रहरी तथा स्थानीय टोलवासीहरूको सहकार्य रहने बताइएको छ।
WAY ग्रुप नेपालले विगत पाँच वर्षदेखि नवलपुर जिल्लाका विभिन्न स्थानहरूमा सरसफाइ तथा वातावरण संरक्षणसम्बन्धी सचेतनामूलक अभियान सञ्चालन गर्दै आइरहेको छ। यस अभियानले नदी संरक्षणप्रति जनचेतना अभिवृद्धि गर्ने अपेक्षा गरिएको छ।
