काठमाडौं फागुन २१,
सुदूरपश्चिम प्रदेश सरकारलाई विश्वासको मत दिने विषयमा नागरिक उन्मुक्ति पार्टीका नेताहरू छलफलमा जुटेका छन् । अध्यक्ष रञ्जीता श्रेष्ठ चौधरीका अनुसार अहिले पार्टीको बैठक जारी छ ।
“हामी अहिले त्यही विषयमा छलफलमा छौँ । विश्वासको मत दिने वा नदिने विषय यही बैठकले निर्णय गर्छ,” अध्यक्ष चौधरीले बाह्रखरीसित भनिन्, “हामीले गर्ने निर्णय नै सुदूरपश्चिम प्रदेशसभाबाट कार्यान्वयन हुन्छ ।”
नागरिक उन्मुक्तिले नदिए पनि नेकपा (माओवादी केन्द्र)ले विश्वासको मत दिएमा सरकार जोगिन्छ । नागरिक उन्मुक्तिले केन्द्रमा विश्वासको मत कायम राखेकाले प्रदेशमा पनि दिनुपर्ने र सरकारमा सहभागिता जनाउन पार्टीभित्र दबाब रहेको बताइन्छ ।
सुदूरपश्चिमका मुख्यमन्त्री कमलबहादुर शाहले आज विश्वासको मत लिँदै छन् । दिउँसो १ बजेका लागि आह्वान गरिएको प्रदेशसभा बैठकमा उनले विश्वासको मत लिने कार्यसूची छ ।
