काठमाडौं माघ ४
विदेशबाट स्वदेश फर्कनेभन्दा विभिन्न अवसरको खोजी गर्दै विदेश जाने नेपालीको संख्या झन्डै साढे तीन लाखले बढी छ ।
गृह मन्त्रालय अन्तर्गतको अध्यागमन विभागले हालै सार्वजनिक गरेको विवरणमा सन् २०२३ मा विदेशबाट स्वदेश फर्कनेभन्दा देश छोडी विदेशिने नेपालीको संख्या निकै ठूलो रहेको पाइएको छ ।
विभागको विवरणअनुसार वर्ष २०२३ मा १६ लाख तीन हजार ८३६ नेपाली विदेश गएका छन् । यो विवरण त्रिभुवन अन्तर्राष्ट्रिय विमानस्थलबाट बाहिरिनेको हो ।
सोही अवधिमा विभिन्न देश पुगेका १२ लाख ६३ हजार ४६९ नेपाली स्वदेश फर्केका छन् । स्वदेश फर्कनेभन्दा विदेशिने नेपालीको संख्या तीन लाख ४० हजार ३६७ ले बढी रहेको विभागको तथ्यांकले देखाउँछ ।
सन् २०२३ मा विभिन्न उदेश्यले विश्वका २०९ देश तथा क्षेत्रमा नेपालीहरू गएका छन् । सोही समयमा विश्वका २१५ देश तथा क्षेत्रबाट नेपालीहरू स्वदेश फर्केको देखिन्छ । उक्त वर्ष नेपालीहरू मानव बसोबास नरहेको अन्टार्टिका बाहेक अष्ट्रेलिया, अफ्रका, दक्षिण अमेरिका, उत्तर अमेरिका र एसयाका प्राय सबै देशमा पुगेका छन् ।
गत वर्ष सबैभन्दा बढी नेपाली गएको देश युनाइटेड अरब इमिरेट्स ९यूएई० हो । यूएईमा दुई लाख ७१ हजार ८८ नेपाली टीआईएबाट गएका थिए । गत वर्ष नै सबैभन्दा बढी नेपाली यूएईबाट नै नेपाल फर्केका थिए । यूएईबाट वर्ष २०२३ मा दुई लाख १७ हजार १५९ जना नेपाली स्वदेश फर्केका थिए ।
सन् २०२३ मा यूएईपछि सबैभन्दा बढी नेपाली टीआईए हुँदै गएको देशमा भारत, कतार, मलेसिया, साउदी अरब, अष्ट्रेलिया, जापान, अमेरिका, बेलायत र कुवेत छन् ।
विभागको तथ्यांकअनुसार भारतमा एक लाख ८१ हजार १६, कतारमा एक लाख ७९ हजार ४४१, मलेसियामा एक लाख ६५ हजार २०१, साउदी अरबमा एक लाख ३६ हजार २०३, अष्ट्रेलियामा एक लाख ५ हजार ३४३, जापानमा ८२ हजार ७७२, अमेरिकामा ६७ हजार ८१०, बेलायतमा ५३ हजार ४०१ र कुवेतमा ४८ हजार १०३ जना नेपाली गएका थिए ।
यस्तै, गत वर्ष भारतबाट दुई लाख २०८, कतारबाट एक लाख ९२ हजार ८८९, मलेसियाबाट एक लाख ८१९, साउदी अरबबाट एक लाख ६ हजार ५२९, अष्ट्रेलियाबाट ६९ हजार ३७७, जापानबाट ४५ हजार ७७४, अमेरिकाबाट ४६ हजार ५४७, बेलायतबाट ३० हजार ५५३ र कुवेतबाट ४४ हजार ३५७ जना नेपाली स्वदेश फर्किएका थिए ।
सन् २०२३ मा दक्षिण कोरियाबाट १९ हजार ३०, थाइल्याण्डबाट २७ हजार ४१२, चीनबाट २० हजार ७९७, हङकङबाट १८ हजार ६०७, ओमानबाट १० हजार ५२६, रोमानियाबाट २ हजार ५४९, सिंगापुरबाट ११ हजार २८७, पोर्चुगलबाट ६ हजार ६४, बंगलादेशबाट १० हजार ४३८ र बहराइनबाट सात हजार ९७७नेपाली स्वदेश फर्किएका थिए ।
गत वर्ष मात्र रुसमा एक हजार ७९५ नेपाली गएको देखिन्छ । रुसबाट नेपाल फर्कनेको संख्या ८०५ रहेको छ ।
स्लोभाकिया, सुरिनेम, म्यासेडोनिया, डोमिनिका, पराग्वे, एल साल्भाडोर, बेनिन, जर्सि, गुयाना, लिसोथोलगायत २२ देशबाट एक–एक नेपाली स्वदेश फर्केका थिए । १५ वटा देशमा भने एक–एक नेपाली मात्र गएको विभागको तथ्यांकमा देखिन्छ ।
गत वर्ष नै विश्वका १२ देशमा नेपाली गएका मात्र छन्, त्यहाँबाट एकजना पनि स्वदेश फर्केका छैनन् । सोही वर्ष विश्वका सात देशबाट नेपाली फर्केका मात्र छन्, गएका छैनन् ।
