– प्रदिप पराजुली
चासो र चर्चाको केन्द्रमा रहेको चितवन क्षेत्र नम्बर ३ मा नेकपा एमाले चुनावी प्रतिस्पर्धामा अन्य दलभन्दा अगाडि रहेको पाइएको छ । यस क्षेत्रअन्तर्गत पर्ने भरतपुर महानगरपालिकाका अधिकांश वडा तथा माडी नगरपालिकामा पुगेर गरिएको कुराकानीमा टोल-टोलमा संगठन रहेका नेपाली कांग्रेस र रास्वपा दुवै रक्षात्मक बन्न पुगेको पाइएको हो ।
नेपाली कम्युनिस्ट पार्टी (नेकपा) भने कमजोर संगठनका बावजुद पार्टीकी उम्मेदवार रेनु दाहालले भरतपुर महानगरपालिकामा गरेको कामका कारण कांग्रेस- रास्वपा भन्दा थोरै अगाडि देखिएको छ । यस्तै, विक्रम पाण्डे उम्मेदवार नबनेका कारण राष्ट्रिय प्रजातन्त्र पार्टी (राप्रपा) भने कमजोर बन्न पुगेको पाइएको छ ।
यस क्षेत्रमा पर्ने अधिकांश वडामा पुगेर फरक-फरक उमेर समूह, जातजाति र समुदायमा कुराकानी गर्दा अधिकांशले चुनावलाई एमालेका शंकर थपलिया र भरतपुर महानगरपालिकाकी पूर्वप्रमुख रेनु दाहालबीचको प्रतिस्पर्धाका रूपमा बढी बुझेको पाइयो ।
औपचारिक हिसाबले चुनावी घरदैलो सुरु हुन बाँकी नै रहेकाले मतदाताले सामाजिक सञ्जालमा देखे/सुनेका आधारमा शंकर र रेनुलाई मात्र प्रतिस्पर्धी ठानेका रहेछन् । त्यसो त यो क्षेत्रमा कांग्रेसले टेकप्रसाद गुरुङ,रास्वपाले सोबिता गौतम, राप्रपाले दीपक थापा मगर, उज्यालो नेपाल पार्टीले डम्बरबहादुर तामाङ, श्रम संस्कृति पार्टीले तेजमान गुरुङ लगायतलाई उम्मेदवार बनाएका छन् । यहाँ १८ दलीय र ६ स्वतन्त्र उम्मेदवार छन् ।
भरतपुर महानगरपालिकाका विभिन्न वडा र माडी नगरपालिकामा पुगेर ३०० जनासँग गरिएको कुराकानीमा ५५ प्रतिशतले यसपटक मत परिवर्तन नगर्ने बताए । त्यसमध्ये ३८ प्रतिशत नयाँ दलतर्फ जान लागेको पाइयो भने १७ प्रतिशतले पुरानैमध्येको अर्को दललाई मत दिने बताए ।
नोट : निर्वाचन आचारसंहिताका कारण दलीय उम्मेदवारका पक्षमा देखिएको मत प्रतिशत हामीले यहाँ प्रकाशित गरेका छैनौं ।
लेखकको बारेमा : पिएन क्याम्पस पोखरामा कानुनमा स्नाकोत्तर गरिरहेका प्रदिप पराजुली चितवनका स्थानीय बासिन्दा हुन् । उनी चितवन ३ मा पुगेर गरेको अध्ययनका आधार उनी आफैले तयार पारेको यो लेख यहाँ प्रशारण गरिएको हो ।
