चितवन, जेठ ४
चितवनका पालिकाहरुमा एमालेले दोश्रो जित निकालेको छ । इच्छाकामना गाउँपालिकामा एमालेका उम्मेद्वार दान बहादुर गुरुङ विजयी भएका हुन् ।
वडा नम्बर ७ को मतगणना जारी छ । १४३७ मत गन्न बाँकी नै छ । तर गणना गर्न बाँकी रहेको भन्दा गुरुङले अग्रता लिएको मत बढी छ । तसर्थ मतगणना नसिकँदै गुरुङ विजयी भएका हुन् । विजयीको घोषणा भने मतगणना सकिएपछि मात्र हुनेछ ।
गुरुङले ५४६० मत ल्याइसकेका छन् भने पाँच दलीय गठबन्धनबाट उम्मेदवार बनेकी नेपाली काँग्रेसकी गीताकुमारी गुरुङले ३९५७ ल्याएकी छिन् । दुबै जनाको १५०३ मतान्तर रहेको छ ।
उपाध्यक्ष्यमा पनि नेकपा एमालेले जित्ने संकेत देखिएको छ । एमालेका तर्फबाट उम्मेद्वार माया सिलवालले ४७२२ मत प्राप्त गरेकी छिन् भने गठबन्धनबाट उम्मेदवार बनेका माओवादी केन्द्रका प्रताप गुरुङले ४४५१ मत ल्याएका छन् । उनीहरुबीच २७१ मतको अन्तर छ ।
चितवनका सात वटा स्थानीय तहमध्ये माडी नगरपालिकामा नेकपा एमालेकी ताराकाजी महत्तो प्रमुखमा विजयी भइसकेकी छिन् । अन्य स्थानीय तहमा मतगणना जारी छ ।
माडीको समाचार हेर्न यहाँ क्लिक गर्नुहोस्, :
