चितवन,फागुन २१-
चितवनमा दुई मतदान कर्मचारीलाई प्रहरीले नियन्त्रणमा लिएको छ । उनीहरूले राष्ट्रिय स्वतन्त्र पार्टी (रास्वपा)को चुनाव चिह्नमा मतदान गर्न आग्रह गरेपछि नियन्त्रणमा लिइएको प्रहरीले जनाएको छ । चितवन निर्वाचन क्षेत्र नम्बर–३ अन्तर्गत माडी मावि केन्द्रमा खटिएका एक कर्मचारीले रास्वपाका पक्षमा मत मागेको आरोपमा नियन्त्रणमा लिइएको प्रहरीले जनाएको छ ।
ती कर्मचारीले रास्वपाका पक्षमा मत मागेको भन्दै त्यहाँ उपस्थित अरू प्रतिनिधि तथा स्थानीयले आपत्ति जनाएका थिए । घटनाबारे जानकारी पाएपछि सम्बन्धित निकायले तत्काल छानबिन सुरु गर्दै उनलाई केन्द्रबाट हटाएर मतदान कार्य अगाडि बढाइएको थियो । निर्वाचन अधिकृत बेलबहादुर विकले भने समस्या ठूलो नभएको भन्दै ती कर्मचारीको नाम बताउन चाहेनन् ।
यस्तै, चितवन–२ को भरतपुर महानगरपालिका–४ अन्तर्गत लंकु मावि केन्द्रमा खटिएका कर्मचारीले रास्वपाकै पक्षमा मत मागेकाले नियन्त्रणमा लिइएको प्रहरीले जनाएको छ । निर्वाचन प्रक्रियामा तटस्थता कायम राख्नुपर्ने जिम्मेवारीमा रहेका अधिकारीले नै कुनै दलका पक्षमा मत मागेको घटना बाहिरिएपछि स्थानीयस्तरमा विरोध भएको थियो ।
घटनाबारे थप अनुसन्धान भइरहेको र आरोपित कर्मचारीलाई नियन्त्रणमा लिइएको प्रमुख जिल्ला अधिकारी गणेश अर्यालले जानकारी दिए ।
