काठमाडाैं साउन २२,
प्रतिनिधिसभामा जारी अवरोध हटाउनेबारे सभामुख देवराज घिमिरेले प्रधानमन्त्री पुष्पकमल दाहाल ‘प्रचण्ड’सहित तीन दलका शीर्ष नेतासँग छलफल शुरू गरेका छन् ।
सिंहदरबारस्थित सभामुखको कार्यकक्षमा सोमवार तीन दलका शीर्ष नेताको बैठक बसेको हो ।
प्रमुख सचेतक तहको छलफलबाट संसद्को गतिरोध नहटेपछि सभामुखले शीर्ष नेतालाई बोलाएका हुन् ।
बैठकमा प्रमुख प्रतिपक्षी दल नेकपा एमालेका नेता केपी शर्मा ओली र नेपाली कांग्रेसका सभापति शेरबहादुर देउवा सहभागी छन् ।
त्रिभुवन विमानस्थल बाहिरबाट समातिएको झण्डै एक क्विन्टल सुन सम्बन्धमा उच्चस्तरीय छानबिन समिति गठनको माग गर्दै एमालेले साउन १० गतेदेखि संसद् बैठक अवरुद्ध गरेको छ ।
सरकारले भने राज्यका निकायबाट भइरहेको छानबिनलाई निष्कर्षमा पुग्न दिनुपर्ने बताउँदै आएको छ ।
प्रतिपक्षको मागमा सत्तापक्ष सहमत हुन नसक्दा संसदमा गतिरोध उत्पन्न भएको हो ।
एमालेको अवरोधका कारण पटक–पटक सूचनामार्फत स्थगित गरिएको प्रतिनिधिसभा बैठक सोमवार दिउँसो १ बजेका लागि राखिएको छ ।
