चितवन बैशाख २,
राष्ट्रिय स्वतन्त्र पार्टीका सभापति एवं चितवन २ का उम्मेदवार रवि लामिछानेले वैशाख १० गते हुने चुनावमा घाम, पानी र असिनाको परवाह नगरी मतदानमा सहभागी हुन आग्रह गरेका छन् ।
आगामी दिनको राजनीतिलाई समेत दिशानिर्देश गर्ने भएकोले वैशाख १० को उपनिर्वाचनको महत्व रहेको उनले बताए ।
चितवनमा चुनाव प्रचार अभियानमा आयोजित कार्यक्रमलाई शनिवार दिउसो सम्वोधन गर्दै लामिछानेले जस्तोसुकै परिस्थितिमा पनि भोट हाल्न जान अग्रह गरेका हुन् ।
‘यहाँ विभिन्न खालका गाइँगुइँ सुनिरहेको छु, घाम, पानी असिना परेपनि भोट हाल्नु होला’ लामिछानेले भने ।
राजनीतिक शुद्धिकरणमार्फत देशको मुहार फेर्ने योजनामा आफू विचलित नभइ लागिपरेको उनले बताए ।
‘म घर घर आउन पाएको छैन, नेता भन्दापनि नीति घर घर पुगोस भन्ने हाम्रो राजनीतिक सिद्धान्त हो’ लामिछानेले भने, ‘बिरामी भेट्न भन्दै स्याउ, केरा बोकेर घर आउने होइन, राम्रो अस्पताल बनाउने र त्यहीँबाट सेवा दिनुपर्छ भन्ने हाम्रो राजनीतिको सिद्धान्त हो ।’
वैशाख १० को उपनिर्वाचन नजिकिँदै गर्दा चितवनमा राजनीतिक गतिविधि तीव्र बनेका छन् ।
चितवनमा रविका प्रतिस्पर्धी कांग्रेसका जीतनारायण श्रेष्ठ र एमालेका रामप्रसाद न्यौपाने छन् ।
