काठमाडौं, मंसिर २७ –
नेपाल प्रिमियर लिग(एनपिएल) मा पहिलो सुपर ओभरमा गएको छ । बिहीवारको पहिलो खेलमा विराटनगर किंग्स र पोखरा एभेन्जर्सबीचको खेल सुपर ओभरमा पुगेको हो ।
बिहीबार कीर्तिपुरस्थित त्रिवि क्रिकेट मैदानमा टस जितेर ब्याटिङमा उत्रिएको विराटनगरले निर्धारित २० ओभरमा सात विकेट गुमाएर १३९ रन बनाएको थियो । १४० रनको लक्ष्यसहित मैदानमा उत्रिएको पोखराले पनि २० ओभरमा ६ विकेट गुमाएर १३९ रन नै बनाएपछि खेल सुपर ओभरमा पुगेको हो ।
पोखरालाई अन्तिम ओभरमा जितका निम्ति १४ रन आवश्यक थियो । पोखराबाट क्रिजमा रेमोन रेफर र नारायण जोशी थिए । विराटनगरबाट बलिङमा आएका बसिर अहमेदले पहिलो बल डट फ्याँके । दोस्रो बलमा पनि बसिरले एक रन मात्र खर्चिए ।
तेस्रो बलमा रेफरले छक्का प्रहार गरेपछि पोखरालाई जितका निम्ति तीन बलमा सात रन आवश्यक थियो । चौथो बल बसिरले पुनः डट फ्याँके । पाँचौँ बल पनि बसिरले डट फ्याँकेपछि पोखरालाई जितका निम्ति अन्तिम बलमा सात रन आवश्यक थियो । अन्तिम बलमा रेफरले छक्का प्रहार गरेपछि खेल ‘टाई’ भएको हो ।
