भरतपुर, २५ पुस
भरतपुरस्थित नारायणी बहुप्राविधिक शिक्षालयमा तेश्रो सेमेस्टरमा अध्ययनरत छात्रा प्रियाकुमारी जैसवालको आत्महत्याप्रति अनेरास्ववियु चितवनको गम्भीर ध्यानाकर्षण भएको छ ।
आज बुधबार अनेरास्ववियु जिल्ला कमिटीका अध्यक्ष हरि आचार्यले जारि गरेको विज्ञप्तिमा जैसवालको आत्महत्या नभई शिक्षालयले हत्या गरेको उल्लेख गरिएको छ । उक्त घटनाका दोषीलाई कार्वाहीको दायरामा ल्याई पीडित विद्यार्थीलाई न्याय दिन अनेरास्ववियु चितवनले माग गरेको छ ।
विज्ञप्तिमा भनिएको छ, “आन्दोलित विद्यार्थीले जफत गरेका मृतक जैसवाल लगाएक उत्तरपुस्तिकाहरू चेकजाँच नहुनुले चरम लापरबाही भएको पुष्टि भएको छ । तत्काल पिडित विद्यार्थी समेतलाई सामेल गरि छानविन समिति बनाएर दोषीउपर कडा कार्वाही र जायज मागहरू न्यायपुर्ण समस्याको समाधान गरि दोषी उपर छानवीन र तत्कालै कार्वाहीको दायरामा नल्याएमा भयावह स्थिति आउन सक्ने अवस्थालाई मध्यनजर गर्दै न्यायको लागि लडिरहेका आम विद्यार्थी प्रति अनेरास्ववियु चितवनको ऐक्यबद्धता जाहेर गर्न चाहन्छौं ।”
नारायणी बहुप्राविधिक शिक्षालयमा तेश्रो सेमेस्टरमा अध्ययनरत छात्रा प्रियाकुमारी जैसवालले प्रथम सेमेष्टरको नियमित परीक्षाको नतिजा आएपछि पुस २३ गते आत्महत्या गरेकी थिइन् ।
प्राक्टिकल र थेउरी दुबैमा फेल भएपछि आत्महत्या गरेको अन्य विद्यार्थीहरुले बताएका छन् । शिक्षकहरुले प्राक्टिकल कापी चेकजाँच नै नगरी जथाभावी नम्बर दिएर फेल गराएको प्रमाण विद्यार्थीहरुले फेला पारेका छन् ।
हेर्नुहोस् विज्ञप्ति :-
