चितवन, ०७ बैशाख
चितवनका युवा उद्यमी महेश लामिछानेले चलचित्र निर्माण गर्ने भएका छन् । द जिएमआई एकेडेमीका सञ्चालक लामिछानेले विशाल ताम्राकारसँग मिलेर चलचित्र ‘भाइरल गोर्खे’ निर्माण गर्न लागेका हुन् ।
सामाजिक संजालले निम्ताएको सकारात्मक र नकारात्मक प्रभावको कथामा निर्माण हुने चलचित्रलाई ‘छड्के’ निर्देशक निगम श्रेष्ठले निर्देशन गर्नेछ्न् । चलचित्रमा अहिलेका चर्चित अभिनेता सौगात मल्ल र सृष्टि श्रेष्ठ प्रमुख भूमिकामा रहनेछन् ।
निर्माण घोषणासँगै चलचित्रको टिजर पोस्टर पनि सार्वजनिक गरिएको छ । जसमा सौगातको क्यारेक्टर लुक्स देखाईएको छ । कमेडी जनरामा बन्ने चलचित्रमा हाल सामाजिक सन्जालमा भाइरल हुने होडबाजी प्रवृत्तिलाई देखाइने निर्माता लामिछानेले जानकारी दिए ।
चलचित्रमा बुद्धि तामाङ, लक्ष्मी गिरी लगायतका कलाकारको पनि अभिनय देख्न सकिन्छ । अमर महर्जनको छायांकन रहने चलचित्र केही दिनमा फ्लोर जाँदैछ । चलचित्रको छायांकन लमजुङ र गोर्खामा हुने निर्माता लामिछानेले बताए । भरतपुर निवासी लामिछाने चितवनका युवा उद्यमीको रुपमा परिचित छन् ।
