काठमाडौं, २ जेठ-
भोलि मंगलबार अर्थात १७ मे मा अन्तर्राष्ट्रिय होमोफोबिया, बाइफोबिया र ट्रान्सफोबियाविरूद्धको दिवस मनाइँदैछ । ‘हाम्रो शरीर, हाम्रो जीवन, हाम्रो अधिकार’ भन्ने विश्वव्यापी नाराका साथ दिवस मनाउन लागिएको हो ।
यौनिक तथा लैंगिक अल्पसंख्यक समुदायको पक्षमा वकालत गर्दै आएको संस्था मितिनी नेपालको आयोजना हुने कार्यक्रममा उपराष्ट्रपति नन्दबहादुर पुनलाई प्रमुख अतिथिको आमन्त्रण गरिएको छ ।
दिवसको अवसरमा गैरीधारास्थित सिल्भर ब्याङ्क्वेटमा आयोजित कार्यक्रममा सातवटै प्रदेशबाट यो समुदायका व्यक्तिहरू, महिला आयोग, राष्ट्रिय समावेशी आयोग, सूचना आयोग, राष्ट्रिय तथा अन्तर्राष्ट्रिय विभिन्न संघ संस्थाका प्रतिनिधिहरूको उपस्थिति रहने मितिनी नेपालकी कार्यकारी अधिकृृत सरिता केसीले जानकारी दिइन् । उक्त कार्यक्रममा २०० भन्दा बढीको उपस्थिति रहने अपेक्षा गरिएको छ ।
सन् १९९० मे १७ मा विश्व स्वास्थ्य संगठनले समलैंगिकतलालाई मानसिक रोगको सूचीबाट हटाई समलैंगिकता हुनु प्राकृतिक प्रक्रिया हो भनि घोषणा गरिएको दिनको स्मरणमा विश्वभर यो दिवस मनाइने गरिन्छ ।
दिवसको अवसरमा मितिनी नेपालसँगै यस क्षेत्रमा कार्यरत विभिन्न संघ संस्थाले विभिन्न कार्यक्रमको आयोजना गरेका छन् । यस दिनलाई संसारभर यौनिक तथा लैंगिक अल्पसंख्यक समुदायका व्यक्तिहरूले अन्तर्राष्ट्रिय स्तरमा विभिन्न कार्यक्रमको आयोजना गर्दै मनाउँदै आएका छन् ।
फरक यौनिकता र लैंगिकताकै कारण यो समुदायले भाग्दै आइरहेको असमानता, हिंसा, चुनौती, कष्टकर भोगाई र कठिन परिस्थितिहरूप्रति नीतिनिर्माता, आम जनता, नागरिक समाज सरकोरवाला संघसंस्थाको ध्यानाकर्षण गराउन यो दिवसले महत्वपूर्ण भूमिका खेल्ने मितिनी नेपालकी अध्यक्ष लक्ष्मी घलानले बताइन् ।
आफूहरूले हरेक व्यक्तिलाई सम्मानजनक जीवन जिउन पाउने अधिकारलाई उनीहरूको लैंगिकता र यौनिकताका आधारमा मूल्याकन गरिनु हुँदैन भन्ने आफ्नो मान्यता रहेको उनको भनाइ छ ।
समाजमा अझै पनि विभेद कायमै रहेको भन्दै भेदभाव, डर, हिंसा बिना आफ्नो पहिचान सार्वजनिक गर्ने र निर्णय लिन पाउने अधिकारको उपभोग गर्न नपाएको उनको भनाइ छ ।
यो समुदाय घरेलु तथा पारिवारिक हिंसाको उच्च जोखिममा रहेको भन्दै राज्यका कानुनले समेत आफूहरूमाथि विभेद गरेको घलानले बताइन् । हरेक वर्ष मनाइँदै आएको यो दिवस कोरोना महामारीको कारण यसअघिका तीन वर्ष मनाउन नसकिएको उनको भनाइ छ ।-न्युज कारखाना
