काठमाडौँ, २८ पुस
नेपाल प्रहरीका पूर्वप्रहरी नायब महानिरीक्षक (डीआईजी) महेशविक्रम शाह रकम हिनामिना मुद्दामा दोषी ठहर भएका छन् । विशेष अदालत काठमाडौंले शाहलाई दोषी ठहर्याउँदै ३ वर्षको जेल सजाय र १६ लाख ६९ हजार ४२ रुपैयाँ ४४ पैसा जरिवाना तोकेको छ ।
मिलेमतोमा अन्यत्र सरुवा भइसकेका प्रहरी जवानहरूको ०७२ साल माघ र फागुन महिनाको तलब भत्ता भ्रष्टाचार गरेको भन्ने उजुरीका आधारमा अरोपपत्र दायर गरिएको अख्तियारको दाबी थियो । पूर्वडीआईजी शाहसँगै मध्यक्षेत्रीय प्रहरी तालिम केन्द्र, भरतपुर, चितवनका तत्कालीन लेखापाल प्रहरी नायब निरीक्षक (सई) दीपेन्द्रप्रसाद पनेरूलाई पनि अदालतले समान सजाय सुनाएको छ ।
पूर्व प्रहरी नायव महानिरीक्षक शाह अछामको साँफेबगर (कालिमाटी) निवासी हुन् । उनको घर कैलाली र काठमाडौँको महाराजगञ्जमा समेत रहेको छ भने उनी ‘छापामारको छोरो’ कथासंग्रह पुस्तकका लेखक पनि हुन् ।
उनले यसका लागि वि.सं. २०६३ को मदन पुरस्कार पाएका थिए ।
