काठमाडाैं फागुन १२
नेकपा (माओवादी केन्द्र) र नेकपा एकीकृत समाजवादीले कांग्रेसले राष्ट्रपति लिने भए पार्टी सभापति शेरबहादुर देउवा नै उम्मेदवार बन्नुपर्ने अनौपचारिक प्रस्ताव गरेका छन् ।
प्रधानमन्त्री निवास बालुवाटारमा शुक्रवार बसेको चार दलको बैठकमा राष्ट्रपतिका लागि देउवालाई अगाडि सार्दा सहमति जुट्ने संकेत दुवै दलले गरेका हुन् ।
राष्ट्रपतिका लागि दाबेदार मानिएका नेकपा एकीकृत समाजवादीका अध्यक्ष माधवकुमार नेपालले देउवा राष्ट्रपतिको उम्मेदवार बन्ने भए आफू पछि हट्न तयार रहेको संकेत गरेका थिए ।
बालुवाटार बैठकमा पुरानो गठबन्धन ब्युँताउने र राष्ट्रपति निर्वाचनमा एउटै उम्मेदवार खडा गर्ने सहमति भएको थियो ।
नेपाली कांग्रेसका एक नेताले देउवालाई राष्ट्रपतिको उम्मेदवार बनाउनु पर्ने अवस्था आकस्मिक रूपमा आइपरेको बताए ।
‘कि सभापतिज्यू राष्ट्रपति बन्न तयार हुनुपर्यो, हैन भने पुस १० गते जस्तै सर्वस्व गुमाउन राजी हुनुपर्यो,’ कांग्रेस संस्थपनइतरका एक नेताले लोकान्तरसँग भने ।
माओवादी र एसको प्रस्तावपछि पार्टीमा आन्तरिक छलफल गर्नुपर्ने भन्दै नेताहरू बालुवाटारबाट बाहिरिएका थिए ।
‘प्रचण्डको रणनीतिमै देउवालाई अगाडि सार्न खोजिएको हामीले बुझेका छौं । देउवासँग काम गर्न कम्फर्टेबल हुने प्रचण्डको विश्लेषण छ,’ ती नेताले भने ।
कांग्रेस प्रवक्ता डा. प्रकाशशरण महतले भने सभापति स्वयं उम्मेदवार बन्नुहुन्छ भन्ने आफूलाई नलागेको बताए ।
‘कांग्रेसबाटै राष्ट्रपति बन्नेमा हामी विश्वस्त छौं । तर सभापति नै उम्मेदवार बन्नुहुन्छ भन्ने लाग्दैन । भोलि बिहान कार्यसम्पादन समितिको बैठक बसेर हामी उम्मेदवार तय गर्छौं,’ उनले लोकान्तरसँग भने ।
राष्ट्रपति कुन दलले पाउने भन्ने टुंगो भने आजै साँझ लाग्ने उनले बताए ।
‘अब पार्टीभित्र केही आन्तरिक छलफल पनि हुन्छन् । अनि आज साँझ पुनः चारदलीय बैठक बसेर राष्ट्रपतिको उम्मेदवार कुन दलले पाउने भन्ने टुंगो लगाउने तयारी छ,’ उनले भने ।
मंसिर ४ गतेको चुनावअघि पनि देउवालाई राष्ट्रपति बनाएर जानेबारे छलफल भएको थियो । देउवा सहमत नभए पनि पुस १० गते पुरानो गठबन्धन भत्किएर एमालेको समर्थनमा प्रचण्डको सरकार बनेको थियो ।
फागुन २५ गते हुने राष्ट्रपति निर्वाचनका लागि भोलि शनिवार उम्मेदवार मनोनयन गर्ने कार्यसूची छ । उम्मेदवारमा सहमति गर्न चार दलको बैठक शुक्रवार साँझ ५ बजे पुनः बैठक बस्दैछ ।
