चितवन, कार्तिक ४–
नेपाल प्रिमियर लिग (एनपीएल) फ्रेन्चाईज टिम चितवन राइनोजले तीन जना विदेशी खेलाडी आज सार्वजनिक गरेको छ । ट्रफी टुर कार्यक्रम अन्तरगत सौराहामा आयोजित कार्यक्रममा तीन विदेशी खेलाडी औपचारिक रुपमा सर्वाजनिक गरेको हो ।
राइनोजले दोस्रो संस्करणका लागि इङल्याण्डका स्टार खेलाडीलाई डेविड मलानलाई आवद्ध गरेको छ ।
मलान १० हजारभन्दा बढी टि–२० रन बनाएका इंग्ल्यान्डका अन्तर्राष्ट्रिय खेलाडी हुन् । उनी पूर्व टि–२० विश्व नम्बर–१ ब्याटर र सन् २०२२ को टि–२० विश्वकप विजेता पनि हुन् । उनको आगमनले रायनोजमा नयाँ उर्जा र जितको विश्वास भरेको टिमको भनाई छ । यस्तै पहिलो संस्करणमा आवद्ध भएका इंग्ल्यान्डका रबि बोपारा र पाकिस्तानका सोहेल तनभिरलाई पनि पुनः दोस्रो संस्करणका लागि आवद्ध गरेको छ ।
बोपाराले पहिलो सिजनको एनपीएलमा राइनोजका लागि सर्वाधिक २८६ बनाउँदै टोलीलाई प्लेअफसम्म पुर्याएका थिए। उनको क्लासिक ब्याटिङ शैलीले चितवनका फ्यानहरूलाई मोहित पारेको थियो ।
तनभिर अघिल्लो सिजनमा १४ विकेटसहित राइनोजका प्रमुख बलर बनेका पाकिस्तानका अनुभवी खेलाडी हुन् । यस सिजनमा पनि बलिङ आक्रमणको नेतृत्व उनले गर्नेछन्। यी तीन विश्वस्तरीय खेलाडीहरूको आगमनले राइनोजलाई एनपीएल उपाधिका प्रमुख दावेदार बनाएको चितवन राइनोजका मुख्य प्रशिक्षक कलाम अलीले बताए ।
चितवन मेडिकल कलेजका प्रबन्ध निर्देशक प्रोफेसर डा.हरिशचन्द्र न्यौपाने तीन विदेशी खेलाडी घोषणाले विश्वस्तरमा चितवन राइनोजलाई चिनाएको बताए । उनले भने–‘क्रिकेट नेपालमा खुशीको कारण बनेको छ। हामी एनपीएलको दोस्रो सिजनलाई अझ भव्य बनाउन काम गर्दैछौँ। आजको घोषणा चितवन राइनोजलाई विश्वस्तरमा उत्कृष्ट फ्रेन्चाइजका रूपमा स्थापित गर्ने हाम्रो यात्राको अर्को कदम हो।’ उनले थपे–‘ट्रफी टुरप्रति देखिएको प्रतिक्रिया साँच्चै उत्साहजनक छ। आजको ‘फेस अफ रायनोज’ र खेलाडी घोषणा कार्यक्रमले यस सिजनलाई थप विशेष बनाएको छ।’
यस्तै राइनोजका प्रमुख कार्यकारी अधिकृत डा.आशिष खड्काले आजको कार्यक्रमलाई चितवन राइनोजलाई थप विशेष बनाएको बताए । उनले भने–“ट्रफी टुरप्रति देखिएको प्रतिक्रिया साँच्चै उत्साहजनक छ। आजको ‘फेस अफ रायनोज’ र खेलाडी घोषणा कार्यक्रमले यस सिजनलाई थप विशेष बनाएको छ।”
राइनोजका निर्देशक प्रताप देवकोटाले यसपटक टिमको उपाधि जित्ने मुख्य लक्ष्य रहेको बताए । उनले भने–‘उर्जा र सकारात्मकता दुवै अद्भुत छन्। टोलीभित्रको आपसी सम्बन्ध र समर्पण नै हाम्रो बल हो, र यसपटक उपाधि चितवन ल्याउने हाम्रो विश्वास बलियो छ।’
