अष्ट्रेलिया, असोज २५–
चितवनका सन्देश राईले अष्ट्रेलियामा एकैपटक जिते पाँच उपाधि जित्न सफल भएका छन् । प्रतिभाशाली युवा राईले अस्ट्रेलियामा सम्पन्न ‘आई कम्पिट नेचुरल साउथ अष्ट्रेलिया’ नामक प्रतियोगितामा एकैपटक पाँच वटा उपाधि जित्न सफल भएका हुन् ।
फिटनेस र बडीबिल्डिङको प्रतिष्ठित मञ्चमा सन्देशले आफ्नो अदम्य परिश्रम, अनुशासन र समर्पणको बलमा पाँचवटा शीर्षक आफ्नो नाममा लेखाउन सफल भएका छन् । उनले पुरुष फिजिक ओपन क्लास १– पहिलो स्थान, पुरुष फिजिक पहिलो पटक प्रतिस्पर्धीमा पहिलो स्थान, पुरुष फिजिक नवप्रवेशी–पहिलो स्थान, पुरुष क्लासिक फिजिकमा दोस्रो स्थान र पुरुष फिजिक सर्वोत्कृष्ट खेलाडी– साउथ अष्ट्रेलिया २०२५ को उपाधि जित्न सफल भएका हुन् ।
यो सफलता सन्देश राईको मात्र नभई सम्पूर्ण नेपाली समुदायको गौरव रहेको भन्दै नेपालीहरुले खुशीयाली मनाएका छन् । उपाधि जित्न सफल राईले भने–‘यो यात्रा सजिलो थिएन, कठोर मेहनत, अनुशासित जीवनशैली र निरन्तर लक्ष्यप्रतिको दृढताले यो मुकाममा पुर्याएको हो।’
सन्देशले भावनात्मक शब्दमा भने–‘यो जित मेरो मात्र होइन, नेपालका हरेक युवाको हो जसले आफ्नो सपना पछ्याउँदै परदेशमा पनि देशको नाम उज्यालो बनाइरहेका छन्।’
उनको सफलताको पछाडि निरन्तर साथ र प्रेरणा दिने व्यक्ति हुन् उनकी जीवनसंगीनी निशा श्रेष्ठ । सन्देशले धन्यवाद व्यक्त गर्दै भने, ‘निशाको सहयोग र हौसला बिना यो सम्भव हुने थिएन। उनले हरेक कठिनाइमा मलाई प्रेरणा दिइन्, विश्वास दिलाइन् र सधैं सपनामा साथ दिइन्।’
