काठमाडौं, पुष १४ –
नेटफ्लिक्सको बहुप्रतीक्षित सिरिज ‘स्क्विड गेम’को सिजन २ यतिबेला स्ट्रिमिङ भइरहेको छ । नेपालमा समेत यो सिरिजलाई हेर्ने दर्शकको संख्या उल्लेख्य छ ।
नेटफ्लिक्सले आधिकारिक तथ्यांक त सार्वजनिक गरिसकेको छैन । यद्यपि, प्रिमियर भएको दिन २६ डिसेम्बरदेखि यो सिरिज विश्वभर धेरै हेरिने श्रृंखला बनेको अन्तर्राष्ट्रिय सञ्चारमाध्यमले जनाएका छन् ।
रिलिजको भएको २४ घण्टाभित्रै ९२ मुलुकमा यो श्रृंखला धेरै हेरिने सूचीको शीर्षस्थानमा छ । यो सूचीमा अमेरिका, भारत, दक्षिण कोरिया, बेलायत, अस्ट्रेलिया, थाइल्याण्ड, ब्राजिल, फ्रान्स, मेक्सिको, दक्षिण अफ्रिका, अर्जेन्टिना लगायतका मुलुक छन् । न्युजिल्याण्डमा यो श्रृंखला दोस्रो स्थानमा छ ।
