काठमाडौं पुस ६
पछिल्लो तीन सातामै नेपाली खेलकुदकै सबैभन्दा चर्चित प्रतियोगिताको रुपमा दरिएको नेपाल प्रिमियर लिग (एनपीएल) फाइनल आज हुँदै छ ।
उपाधिका निम्ति मधेस प्रदेशको प्रतिनिधित्व गरेको जनकपुर बोल्ट्स र सुदूरपश्चिमको सुदूरपश्चिम रोयल्सबीच प्रतिस्पर्धा हुँदै छ ।
प्रतियोगिताको लिग चरणबाट शीर्ष दुईमा रहँदै प्लेअफ आइपुगेका टिम हुन्, जनकपुर र सुदूरपश्चिम । लिग चरणका सातमध्ये एक खेलमा मात्र हार व्यहोरेको सुदूरपश्चिमले १२ अंकसहित शीर्ष स्थान हाशिल गरेको थियो । दोस्रो स्थानमा रहँदै प्लेअफ आएको जनकपुरले समान खेल खेल्दा दुई हारसहित १० अंक जोडेको थियो ।
जनकपुरविरुद्ध लिग चरणमा जित निकाल्ने दुईमध्यको एक टोली हो, सुदूरपश्चिम । दीपेन्द्रसिंह ऐरीको कप्तानीमा रहेको सुदूरपश्चिमले लिगमा जनकपुरविरुद्ध ७२ रनको जित निकालेको थियो । यी दुवै टिमले हार भने चितवन राइनोजविरुद्ध व्यहोरेका थिए । प्रतियोगिताको शीर्ष दुई टोलीलाई हराएको चितवनले भने इलिमिनेटरबाट माथिको यात्रा तय गर्न सकेन ।
शनिबार कीर्तिपुरस्थित त्रिवि क्रिकेट मैदानमा हुने यो बहुप्रतिक्षित खेल दिउँसो १२ः३० बजेदेखि सुरु हुनेछ ।
प्रतियोगिताको पहिलो क्वालिफायरमा पनि जनकपुरविरुद्ध आठ विकेटको सहज जित निकालेको सुदूरपश्चिम स्वभावलै बलियो दाबेदार बनेको छ । बलिङ, ब्याटिङ र फिल्डिङ तीनै क्षेत्रमा सन्तुलन बनाएको सुदूरपश्चिमले समर्थकबाट पनि त्यस्तै साथ पाइरहेको छ । तर, कप्तान दीपेन्द्र भने यसअघि दुई पटक हराएकै कारण फाइनलमा कमजोर आक्न नहुने बताउँछन् ।
“यसअघिका खेलहरू सबै राम्रो भए । राम्रो भइरहेको छ, प्रशिक्षण पनि । हामी फाइनलका लागि तयार छौँ । हरायौँ भन्दैमा सहजरूपमा लिने होइन । उनीहरूको टिम पनि राम्रो छ,” फाइनलको पूर्वसन्ध्यामा आयोजित पत्रकार सम्मेलनमा सुदूरपश्चिमका कप्तान दीपेन्द्रले भने, “जसरी लिगका खेलहरू खेलेका थियौँ, त्यसरी नै खेल्नेछौँ । धेरै सोचेका छैनौँ । आफ्नो शतप्रतिशत दिनेछौँ ।”
दुई पटक हार व्यहोरेको टिमविरुद्ध जितसहित प्रतियोगिताको उपाधि जित्नुभन्दा ठूलो बदला जनकपुरलाई पक्कै पनि अर्को हुँदैन । प्रतियोगिताभर सुदूरपश्चिमपछि सबैभन्दा राम्रोसँग टिमलाई साथ दिइरहेको जनकपुरका समर्थकका लागि पनि योभन्दा ठूलो आनन्दको अनुभव अरु हुँदैन । तर, फाइनलअघि जनकपुरका कप्तान आसिफ सेखलाई यही प्रश्नको सामना पनि गरे । बदलाको अवसर छ, त्यसका लागि तयार हुनुहुन्छ ?
यो प्रश्नमा आसिफले सरल तर गहन जवाफ फर्काए । उनले जनकपुरको ध्यान बदलाभन्दा स्तरीय क्रिकेट प्रस्तुत गर्नेमा रहेको बताए ।
“बदला लिने मानसिकता छैन । स्तरीय क्रिकेट खेल्छौँ । मैदानबाट निस्किँदा आफूले सक्दो दियौँ भन्ने महसुस हुनुपर्यो,” आसिफले भने ।
यस्तो छ दुई टिमको फाइनलसम्मको यात्रा
फाइनलसम्मको यात्रा तय गर्दा जनकपुरले नौ र सुदूरपश्चिमले आठ खेल खेलेका छन् ।
जनकपुरले प्रतियोगिताको सुरुका चार खेलमा लगातार जित निकाल्दै बलियो सुरुआत गरेको थियो । तर, लिग चरणका अन्तिम तीन खेल खेल्दा भने जनकपुरले दुई खेलमा हार व्यहोरेको हो ।
जनकपुरले पहिलो खेलमा विराटनगर किंग्सविरुद्ध आठ विकेटको, दोस्रो खेलमा कर्णाली याक्सविरुद्ध पनि आठ विकेटको नै, तेस्रो खेलमा पोखरा एभेन्जर्सविरुद्ध सात विकेटको र चौथो खेलमा लुम्बिनी लायन्सविरुद्ध एक रनको जित निकालेको थियो ।
पाँचौँ खेलमा भने जनकपुरले सुदूरपश्चिम रोयल्सविरुद्ध ७२ रनको हार व्यहोरेको थियो । छैटौँ खेलमा काठमाडौंविरुद्ध पाँच विकेटको जित निकालेको जनकपुरले सातौँ खेलमा चितवन राइनोजसँग ३२ रनको हार व्यहोरेको हो ।
पहिलो क्वालिफायरमा सुदूरपश्चिमसँग हार व्यहोरेको जनकपुरले दोस्रो क्वालिफायरमा भने कर्णाली याक्सविरुद्ध दुई विकेटको कठिन जित निकालेको थियो ।
यता, लिगको आफ्नो पहिलो खेलमा सुदूरपश्चिमले विराटनगर किंग्सविरुद्ध ९० रनको जित निकालेको थियो । दोस्रो खेलमा काठमाडौं गुर्खाजविरुद्ध ७३ रनको र तेस्रो खेलमा लुम्बिनी लायन्सविरुद्ध ४५ रनको जित निकालेको थियो । चौथो खेलमा भने सुदूरपश्चिमले चितवन राइनोजविरुद्ध ३३ रनको हार व्यहोरेको थियो ।
पाँचौँ खेलमा सुदूरपश्चिमले जनकपुर बोल्ट्सविरुद्ध ७२ रनको, छैटौँ खेलमा पोखरा एभेन्जर्सविरुद्ध पाँच रनको र सातौँ खेलमा कर्णाली याक्सविरुद्ध ६ विकेटको जित निकालेको थियो ।
