काठमाडौँ, १४ माघ
सहकारी ठगीका फरार अभियुक्त गीतेन्द्रबाबु (जीबी) राईविरुद्ध इन्टरपोलमा डिफ्युजन नोटिस जारी भएको छ । जिल्ला प्रहरी कार्यालय, कास्कीको पत्राचारका आधारमा राईविरुद्ध डिफ्युजन नोटिस जारी भएको हो ।
सूर्यदर्शन सहकारीसँग जोडिएको ठगीसम्बन्धी मुद्दामा डिफ्युजन नोटिस जारी गरिदिन भन्दै केहीअघि प्रहरी प्रधान कार्यालयलाई पत्राचार गरेको थियो । त्यसको आधारमा इन्टरपोलको नेसनल सेन्ट्रल ब्युरो (एनसिबी) काठमाडौंले डिफ्युजन नोटिस जारी गर्न इन्टरपोलको महासचिवालायलाई अनुरोध गरेको हो ।
केन्द्रीय प्रहरी प्रवक्ता डिआइजी भीमप्रसाद ढकालका अनुुसार दुई साताअघि नै डिफ्युजन नोटिस जारी गर्ने विषय प्रक्रियामा गएको हो । सूर्यदर्शन सहकारीका वर्तमान अध्यक्ष थानबहादुर बुढामगर र पूर्वअध्यक्ष भूपेन्द्र राईविरुद्ध पनि डिफ्युजन नोटिस जारी गर्न सिफारिस गरेको उनले बताए ।
राई हाल मलेसियामा रहेको प्रहरीको आशंका छ । यस्ते नोटिस जारी भएपछि उनलाई डिपोर्ट गराएर नेपाल ल्याउने प्रक्रिया थालिने प्रहरीले जनाएको छ । ग्यालेक्सी फोर–के टेलिभिजनका सञ्चालक रहेका राईमाथि आफैँ अध्यक्ष रहेको सूर्यदर्शन सहकारीका बचतकर्ताको रकम हिनामिनाको आरोप लागेको छ ।
उनीमाथि कास्कीमा मात्रै १९ हजारभन्दा बढी बचतकर्ताको १ अर्ब ३५ करोड रुपैयाँभन्दा बढी रकम हिनामिना गरेको आरोप छ ।
