बैशाख ३, चितवन –
भरतपुर महानगरको व्यस्त सडक हो भरतपुर हाइट । अत्याधिक सवारी चाप रहने वीरेन्द्र क्याम्पस चोकदेखि नारायणगढ पुल्चोकसम्म अहिले सडक निर्माण कार्य भइरहेको छ ।
भरतपुर महानगरपालिको कार्यालय, दुई ठूला सपिङ सेन्टर, वीरेन्द्र बहुमुखी क्यापस, ठूला होटल तथा चितवनकै मुख्य बजार क्षेत्र भएकाले यहाँ सँधै जसो सवारी चाप देखिन्छ । सडकमा सवारी चाप र ट्राफिकको अस्तव्यवस्तताले दिनहुँ जसो सवारी दुर्घटना हुने क्षेत्रकै रुपमा चिनिने वीरेन्द्र क्याम्पस चोकदेखि भरतपुर ओरालोको भाटभटेनी क्षेत्र अहिले थप जोखिमयुक्त बनेको छ ।
वीरेन्द्र क्याम्पस चोकमा रहेको सिजी ल्याण्डमार्क र भाटभटेनी आसपासमा भइरहेको निर्माण कार्यमा चरम लापरवाही देखिन्छ ।
डिभिजन सडक कार्यालय भरतपुरका अनुसार निर्माण कार्य भइरहेका क्षेत्रमा रिफ्लेक्टिङ लाइट, टेप र ठाँउठाँउमा बोर्ड तथा ट्राफिक कोन राखेर काम गर्नुपर्ने हुन्छ । साथै निर्माण कार्यमा संलग्न कर्मचारीहरुले सेफ्टी हेलमेट, रिफ्लेक्टर ज्याकेट अनिवार्य लगाउनुपर्ने हुन्छ ।
तर, निर्माण कार्य सुरु भएको एक साता बितिसक्दा पनि यस क्षेत्रमा सुरक्षाका न्यूनतम मापदण्ड पालना गरेको देखिँदैन । न त कर्मचारी तथा कामदारहरु नै सेफ्टी हेलमेट तथा रिफ्लेक्टर ज्याकेटमा देखिन्छन् ।
सडक डिभिजन भरतपुरका सूचना अधिकारी शिव खनालले सो क्षेत्रमा निर्माण कार्य सुरु भइसकेको बारे आफू जानकार नै नभएको बताए ।
नाला निर्माणको क्रममा सोलिङका लागि ढुंगा राख्न सुरु गरिएको छ । तर ती निर्माण सामग्री मापदण्ड अनुरुप भए नभएको अनुगमन समेत भएको देखिँदैन ।
पूर्वपश्चिम राजमार्गको अति नै व्यस्त क्षेत्रमा भइरहेको निर्माण कार्यले सवारी व्यवस्थापनमा समेत कठिनाई भएकाले सुरक्षा सर्तकता पालना गरिदिन पटकपटक आग्रह गरेको जिल्ला ट्राफिक प्रहरी कार्यालय चितवनका प्रमुख भगवानराज थापाले बताए ।
मुख्य चोकहरुमा मास हेडलाइट जडानका लागि खनिएको खाडल र सडकमा नाला निर्माण लागि खनिएको खाडल आसपासमा रिफ्लेक्टिङ टेप तथा ट्राफिक कोन राख्न आग्रह गरेको उनले बताए । ‘यो क्षेत्र दुर्घटनाको अधिक जोखिम क्षेत्र हो’ ट्राफिक प्रमुख थापाले भने, ‘न्यूनतम प्रावधान पूरा गरिदिन हामीले पटकपटक आग्रह पनि गरेका छौं तर सम्बन्धित निकायले ध्यान दिएकै छैन ।’
वीरेन्द्र क्याम्पस चोकदेखि भाटभटेनी क्षेत्रलाई मात्र हेर्ने हो भने यहाँ केही दिनदेखि असरल्ल छरिएका निर्माण सामाग्री, जथाभावी थुपारिएका ढुंङ्गामात्र छन् । अटोलेबल मेसिन, थेरोलाइट, टोटल स्टेशन, रेन्जिङ रड जस्ता सामाग्री जथाभावी सडकमा राखिएका देखिन्छन् ।
खनेर साँघुरो बनाइएको सडकमा जथाभावी राखिएका सामान पन्छाउँदै हिँड्दा खाल्डोमै खसिन्छ की जस्तो लाग्ने गरेको सर्वसाधारणले गुनासो गर्ने गरेका छन् ।
‘पार्किङको समस्या छँदै थियो त्यसमाथि बाटो खनेर हिँड्न अस्तव्यस्त भएको छ’ एक सर्वसाधारणले आक्रोश पोख्दै भने, ‘ अब यो सामानहरु पनि हामीले नै जोगाइँदिँदै हिड्नुपरेपछि हामी खाल्डोमा खसे के गर्ने ? ।’
केही महिना अघि मात्रै चितवन राष्ट्रिय निकुञ्जको मध्यवर्ती क्षेत्र र डिभिजन वनबीचको क्षेत्रमा सडकछेउमा खनिएको नालीमा खसेर एउटा भाले गैँडा मरेको घटनाले संरक्षणको क्षेत्रमा चासो दिनेहरुमाझ चर्चा बटुलेको थियो ।
राष्ट्रिय निकुञ्जले सडक डिभिजन कार्यालयको लापरबाहीका कारण उक्त गैंडाको मृत्यु भएको निष्कर्ष निकालेको थियो ।
वन्यजन्तु आवतजावत गर्ने एउटा साँघुरो मार्गमा जसरी संवेदनशीलता र मूल्यांकनका साथ काम हुनुपर्ने थियो त्यो नदेखिएको संरक्षणकर्मीहरुको ठम्याई थियो ।
सोही निर्माण कार्य अहिले व्यस्त बजार क्षेत्रमा आइपुगेको छ । तर सुरक्षा संवेदनशीलतातर्फ निर्माण कम्पनीले अझै ध्यान दिएको छैन । आम सर्वसाधारणको ज्यान जोखिममा पारेर यस्ता निर्माण कार्य भइरहँदा सम्बन्धित निकायको ध्यान बेलैमा जानु पर्ने देखिन्छ । नत्र यसैका कारण दुर्घटना भई मान्छेको ज्यान नजाला भन्न सकिन्न ।
