चितवन, मंसिर २४-
चितवनको नारायणगढस्थित क्याम्पा चौरमा भोली मंसिर २५ गते ‘नेपथ्य लाइभ कन्सर्ट’ हुने भएको छ ।
मानवता प्रवद्र्धनका साथै चितवनमा रहेको मानवसेवा आश्रमको बाँकी भवन निर्माण तथा आश्रित बेसहाराहरुको संरक्षण र पालन पोषणको सहयोगार्थ ‘नेपथ्य लाईभ कन्सर्ट’ हुने भएको हो ।
मानवता प्रवद्र्धनका लागि देशका प्रमुख १० शहरमा गर्न लागेको कन्सर्टअन्तरगत चितवनको योे कार्यक्रम चौथो हो ।
यसअघि मंसिर १६ गते विराटनगर र १९ गते वीरगञ्जमा र २२ गते हेटौंडामा कार्यक्रम सम्पन्न भइसकेको छ । तीन वटै कार्यक्रममा पाँच हजार बढी दर्शकको सहभागिता रहेकोमा चितवनमा भने ६ हजार दर्शक उपस्थित गराउने लक्ष्य रहेको छ ।
यस्तै, मंसिर २९ गते नेपालगञ्जको रङ्गशालामा, पौष ३ गते धनगढी रङ्गशाला, ६ गते सुर्खेतको खुल्लामञ्च, ९ गते बुटवलको कालिका मानवज्ञान मावि सेक्टर २ (रामनगर)मैदान, १२ गते पोखराको प्रदर्शनी केन्द्रमा नेपथ्य गुञ्जिने छ ।
अन्तिम कार्यक्रमको रुपमा अङ्ग्रेजी नयाँ वर्षको अघिल्लो रात ‘न्यू इयर इभ’ को दिन पौष १६ गते काठमाडौँको भृकुटीमण्डपमा हुनेछ । कन्सर्टमा सहभागि हुन मानवसेवा आश्रमको मुख्य कार्यालयका साथै अनलाइनबाट पनि टिकट लिन सकिन्छ । टिकट शुल्क एक हजार रुपैयाँ रहेको छ ।
कन्सर्टका लागि नेपथ्य व्याण्डका मुख्य गायक अमृत गुरुङसहितको टिम चितवन आइसकेको छ । टिमलाई आश्रमका अध्यक्ष रामजी अधिकारी, कन्सर्टका संयोजक ओमकार कँडेललगायत आश्रमका अभिभावकहरुले स्वागत गरेका छन् ।
चितवनमा कार्यक्रमको तयारी अन्तिम चरणमा पुगेको आश्रमले जनाएको छ ।
