काठमाडौं, भदौ १८-
राष्ट्रिय स्वतन्त्र पार्टी (रास्वपा)का सांसद मनीष झाले सञ्चारमन्त्री तथा सरकारका प्रवक्ता पृथ्वीसुब्बा गुरुङको अभिव्यक्तिप्रति आपत्ति जनाएका छन् ।
प्रतिनिधिसभा बैठकमा मंगलबार उनले सरकारका प्रवक्ताले प्रहरी संगठनका प्रमुखले बोल्दा ‘जिब्रो थुतिदिन्छु’ भन्दा कहाँको वाक् स्वतन्त्रता हो भनि प्रश्न गरे । “लोकतन्त्रको पाँचवटा आधारभूत सिद्धान्तमध्ये पहिलो फ्रिडम अफ एक्सप्रेसन हो । प्रहरी संगठनका प्रमुखले सांगठनिक चुनौती अभिव्यक्त गर्नुभयो भने सरकारका प्रवक्ता तथा मन्त्रीले जिब्रो थुतिदिन्छु भनेर भन्छन् भने कहाँको वाक् स्वतन्त्रता र कहाँको लोकतन्त्र ?,” उनले सोधे ।
उनले एमालेका अग्रज नेताले पहिले आफ्ना मन्त्रीलाई सभ्यता सिकाउन सुझाव पनि दिए । “हामीले त्यही दलका पाका अग्रजहरूले सभ्यता सिकाउनुहुन्छ भने अनुरोध छ । आफ्नै मन्त्रिपरिषद्को मन्त्रीलाई पहिला सिकाउनुुस्,” उनले भने ।
गएको शनिबार पोखरामा भएको कार्यक्रममा सञ्चारमन्त्रीले आईजीपीको जिब्रो थुतिदिनुपर्ने भन्ने अभिव्यक्ति दिएका थिए । उनको अभिव्यक्तिले तरंग पैदा गरेको छ ।
