चितवन, माघ २ –
भरतपुर महानगरपालिकाको नयाँ प्रशासकीय भवनको उद्घाटन गरिएको छ । शुक्रबार पूर्व प्रधानमन्त्री एवम् नेपाली कम्युनिष्ट पार्टीका संयोजक पुष्पकमल दाहाल प्रचण्डले भवन उद्घाटन गरे । भवनको प्रचण्डले नै शिलान्यास गरेका थिए ।
६ तला रहेको नयाँ भवनको भुईं तलामा नगर प्रमुख, उप प्रमुख र प्रमुख प्रशाकसकीय अधिकृतको कार्यालय राखेर भवन उद्घाटन गरिएको हो । भुईं तलामा रहेको यी तीन वटा कार्यालयभित्रकोमात्र इन्टेरियरको काम सकिएको छ । बाँकी रहेका तला र भुईं तलाका अन्य कोठाहरुको इन्टेरियरको काम सकिएको छैन ।
भवन पूर्णरुपमा निर्माण सम्पन्न नभएकै अवस्थामा हतारहतार उद्घाटन गरिएपछि राजनीतिक दल र नागरिक समाजले विरोध जनाउन थालेका छन् । रास्वपा भरतपुर महानगर कमिटीले विज्ञप्ति नै जारी गरी निर्माण सम्पन्न भइनसकेको अधुरै भवनलाई उद्घाटन गर्न खोज्नु राजनीतिक स्टण्डमात्र भएको बताएको छ ।
भरतपुर महानगरपालिका प्रमुख रेनु दाहाल आगामी फागुन २१ मा हुने प्रतिनिधि सभा निर्वाचनमा चितवन ३ बाट उम्मेद्वारी दिने तयारी गरिरहेकी छन् । उम्मेद्वारी दिनु पहिले महानगर प्रमुखबाट राजीनामा दिनुपर्दछ । यही माघ ६ गते उम्मेद्वारी दिने कार्यतालिका रहेको छ । आफू प्रमुख छँदै उद्घाटन गर्ने रेनुको रहरले निर्माण सम्पन्न भइनसकेको प्रशासकीय भवन उद्घाटन गरिएको भन्दै विरोध भएको हो ।
५३ करोड ३२ लाख ६४ हजारको लागतमा ३० महिनामा निर्माण सम्पन्न गर्ने गरी २०७९ साल साउनमा भरतपुर महानगरपालिकासँग शर्मा÷सगरमाथा÷सगुन जेभीले सम्झौता गरेको थियो ।
सम्झौता अनुसार २०८१ माघमा निर्माण सम्पन्न भइसक्नुपर्ने हो । समयमा निर्माण सम्पन्न हुन नसकेपछि म्याद थप गरी २०८२ माघ १८ सम्म निर्माण सम्पन्न गरिसक्ने गरी म्याद थप भएको थियो ।
भरतपुुर महानगपालिकाका वरिष्ठ डिभिजनल इन्जिनियर सन्तोष आचार्यका अनुसार कुल लागत ५३ करोड ३२ लाख ६४ मध्ये हालसम्म ४५ करोड ९७ लाख ५१ हजार रुपैयाँ खर्च भइसकेको छ । संघ, प्रदेश र भरतपुर महानगपालिका तीनै तहको लगानीमा भवन निर्माण गरिएको हो । संघीय सरकारको २१ करोड ५८ लाख १४ हजार, बागमती प्रदेश सरकारको १९ करोड ८९ लाख ३६ हजार र महानगरपालिकाको ४ करोड ५० लाख खर्च भएको छ । इन्टेरियरको काम सम्पन्न गर्न बाँकी रहेको छ ।
इन्जिनियर आचार्यका अनुसार इन्टेरियर अन्तर्गतकै फर्निसिङ् लगायतका कार्यका लागि छुट्टै ठेक्का सम्झौता हुनेछ । जसका लागि ४.५ करोड बजेट विनियोजन गरिएको छ ।
