पोखरा, कात्तिक ८-
राष्ट्रिय स्वतन्त्र पार्टी (रास्वपा)ले आफ्ना सभापति रवि लामिछानेमाथि राजनीतिक प्रतिशोध साँधिएको पुष्टि भएको बताएको छ । रास्वपाले पोखरामा आयोजना गरेको पत्रकार सम्मेलनमा यस्तो बताएको हो ।
सो पार्टीका उपसभापति स्वर्णिम वाग्लेले लामिछानेलाई पोखरा ल्याएर थुनामा राखेको १२५ घण्टामा ४–५ घण्टामात्रै बयान लिनु नै राजनीतिक प्रतिशोध पुष्टि भएको बताए ।
“हाम्रो सभापतिलाई दाल भात खुवाउन ल्याएको हो पोखरा ? देखाइदिन्छु भन्ने शैलीमा सरकार प्रस्तुत भयो,” उनले भने,“१२५ घण्टामा ४–५ घण्टामात्रै बयान भएको छ । कागजात पुगेन भनेर फेरि म्याद थप्ने तयारी गरेको छ ।”
उनले न्यायपालिकाबारे आफ्नो पार्टीका कसैले नकारात्मक टिप्पणी नगरेको बताएका छन् ।
“न्यायालयले जस्तो फैसला सुनाए पनि विमति राख्नुपर्ने अवस्था आए पनि स्वीकार गर्छौँ,” उनले भने, “कार्यपालिकाको प्रतिनिधिमाथि प्रश्न उठाएका हौँ । छानीछानी डीएसपी र सीडीओ पठाउने काम भएको छ ।”
