धनगढी, असोज ११-
भारतबाट घर फर्किने क्रममा महाकाली नदीमा खसेर एक युवक बेपत्ता भएका छन् । पुर्चौडी नगरपालिका– पुर्चौडी–५ कुवाकोटका ३३ वर्षीय अमर धामी दशैं मनाउन घर फर्किने क्रममा महाकाली नदीमा खसेर बेपत्ता भएका हुन् ।
सुदूरपश्चिमका प्रमुख प्रहरी नायब महानिरीक्षक (डीआईजी) रविन्द्र केसीका अनुसार भारतबाट घर फर्किरहेका धामी आज (शुक्रबार) बिहान साढे ११ बजेतिर दशरथचन्द नगरपालिका–८ को झुलाघाट बजार नजिकै सडकबाट महाकाली नदीमा खसेका हुन् ।
उनका अनुसार झुलाघाटबाट बैतडी सदरमुकामतर्फ आउने जिप पार्किङ हुने क्षेत्रमा हिँडिरहेको अवस्थामा चिप्लिएर महाकाली खसेका थिए । नदीमा खसेर बेपत्ता भएका धामीको खोजी कार्य भइरहेको छ । धामी खसेको ठाउँमा सडक माथिबाट पहिरो समेत खसेका कारण जोखिम रहेको प्रहरीले जनाएको छ ।
