काठमाडौँ, २२ जेठ
सत्तारुढ नेकपा एमालेले झापाको गिरिबन्धु टी–स्टेटको जग्गामा १० हजार करोड भ्रष्टाचार गरेको भन्दै पार्टी अध्यक्ष केपी शर्मा ओलीमाथि लगाएको आरोपप्रति आपत्ति जनाएको छ ।
मंगलबार बसेको प्रतिनिधि सभा बैठकको विशेष समयमा एमाले सचिव योगेश भट्टराईले अध्यक्ष ओलीमाथि बालेनले लगाएको आरोप असहिष्णुता भएको बताएका हुन् ।
बालेनले संयमता गुमाउँदै गएको र आशा गरेका युवालाई धोका दिन उद्धत रहेको एमालेको आरोप छ । बालेनको विरोध गर्दा उनको साइबर सेनाले हमला गर्छ भन्ने थाहा हुँदाहुँदै पनि आफूहरूले गलत कुरालाई विरोध गर्ने भट्टराईले बताए ।
‘काठमाडौं महानगर देशको राजधानी शहर हो, नेपालको सभ्यताको प्रतीक हो । त्यहीँको मेयरले सभ्यतामाथि धावा बोल्दैछ । प्रमुखजीलाई सहयोग गर्न हामी तयार छौं, तर उत्तेजनाका कुरा गरेर युवाको सपनालाई धोका दिँदै हुनुहुन्छ,’ भट्टराईले भने, ‘नेता जेल बसेको कुरालाई मजाकमा उडाउनुभयो । आफ्नै इतिहास र संस्कृतिप्रति मजाक भयो । हरेक व्यक्तिका सीमा र अधिकार छन् । यो व्यवस्था ल्याउन मरिमेटेको नेतालाई गालीगलौज गर्नु, आकाशतिर थुकेजस्तो हो ।’
उपमेयरसहित वडाध्यक्षलाई बालेनसँग मिलेर सहकार्य गर्न एमालेले निर्देशन दिएको स्मरण गर्दै उनले बालेनले अन्यत्रको रिस अध्यक्ष ओलीमाथि पोखिरहेको टिप्पणी गरे ।
