काठमाडौँ, १८ जेठ
मधुमेह रोगको उपचारमा एक ठूलो उपलब्धि हासिल गरेको दावी चीनका वैज्ञानिकले गरेका छन् । मधुमेह पूरै निको हुने उपचार पद्धतिको सफलतापूर्वक प्रयोग गरिएको खबर चिनियाँ मिडियाले दिएका छन् ।
अहिले मधुमेह देखिएपछि पूरै निको बनाउन नसक्ने र त्यसलाई नियन्त्रणमा राख्नका लागि मात्रै उपचार गरिने गरिएको छ ।
इनोभेटिव सेल थेरेपीमार्फत एक बिरामीको मधुमेह पूर्णरुपमा निको बनाएको दावी चिनियाँ वैज्ञानिकहरुको छ । विश्वमै पहिलो पटक यो पद्धतिको सफल परीक्षण गरिएको हो।
साउद चाइना मर्निङ पोस्टमा प्रकाशित खबरअनुसार एक ५९ वर्षीय बिरामीमा यो उपचार पद्धति लागू गरिएको थियो । २५ वर्षदेखि टाइप टु डाइबेटिजबाट पीडित रहेका ती व्यक्तिलाई दैनिक इन्सुलिन दिनुपर्थ्यो । सन २०१७ मा उनको मिर्गौला समेत प्रत्यारोपण गरिएको थियो।
सांघाई चानझेङ अस्पतालको टिमले चाइनिज एकेडेमी अफ साइन्ससँगको सहकार्यमा यो प्रविधि विकास गरेको रिपोर्टमा भनिएको छ ।
ती बिरामीलाई २०२१ जुलाईमा सेल थेरापी दिइएको थियो । त्यसको ११ हप्तापछि उनलाई बाहिरी इन्सुलिन दिन बन्द गरियो । बिस्तारै उनले मधुमेह नियन्त्रणका लागि खाने औषधिहरु पनि बन्द गरे ।
फलोअफ परीक्षणका क्रममा पत्ता लाग्यो कि– उनको प्याङ्क्रियाजको काम गर्ने क्षमता पहिलेकै अवस्थामा फर्किएको छ ।
पछिल्लो ३३ महिनादेखि बिरामी इन्सुलिनबिना रहेको पनि रिपोर्टमा उल्लेख छ । यो सफलताबाट वैज्ञानिकहरू उत्साहित भएका छन् ।
ब्रिटिश कोलम्बिया विश्वविद्यालयको सेलुलर र फिजियोलोजिकल विज्ञान विभागका प्राध्यापक टिमोथी किफरले यस अध्ययनको प्रशंसा गर्दै भनेका छन, ‘मलाई लाग्छ यो अध्ययनले मधुमेहको सेल थेरापीको क्षेत्रमा महत्त्वपूर्ण प्रगतिको प्रतिनिधित्व गर्दछ।’
चीनमा मधुमेहका बिरामीको संख्या अध्याधिक छ । १४ करोड बढी मधुमेहबाट पीडित रहेको र ४ करोडले त इन्सुलिन लिएर जीवन लामो बनाउन काम गरिरहेका छन् ।
यो उपचार पद्धतिले मधुमेह नियन्त्रणमा ठूलो सफलता मिल्ने विश्वास गरिएको छ ।
