काठमाडौँ, १३ असोज
असल व्यक्ति बन्नमा अभिभावकको भूमिका महत्त्वपूर्ण मानिन्छ । कतिपय अवस्थामा त आमा र बुवाको जिम्मेवारी एक अर्काका पूरक हुन्छन् तर बच्चाको राम्रो विकासका लागि केही जिम्मेवारी छन् जुन बुवाले पूरा गर्नुपर्ने हुन्छ । बुबाको व्यवहार, उनीहरूको अन्य मानिससँगको व्यवहारले बच्चाको विकासमा धेरै प्रभाव पार्छ । एक जिम्मेवार बुबाले सधैँ आफ्ना बच्चालाई शारीरिक र मानसिक रूपमा राम्रो वातावरण प्राप्त होस् र बच्चाले पनि आफ्ना समस्याहरू खुलेर व्यक्त गर्न सकुन् भन्ने सुनिश्चित गर्न प्रयास गर्नुपर्छ । हामी यहाँ बच्चाको विकासमा बुबाको केही महत्त्वपूर्ण जिम्मेवारीबारे कुराकानी गर्दै छौँ ।
बच्चाको विकासमा बुबाको जिम्मेवारी
संरक्षकको भूमिका
इन्डियन पेरेन्टिङ वेबसाइटका अनुसार, बच्चाहरू आफ्ना बुबाको वरिपरि हुँदा सुरक्षित महसुस गर्छन् । जब बच्चाले सुरक्षित महसुस गर्छन्, उनीहरू आफ्नो काम र गतिविधिहरूमा राम्रोसँग ध्यान केन्द्रित गर्न सक्षम हुन्छन् । त्यसैले आफ्ना छोराछोरीलाई सम्झाउने र कुनै पनि समस्याबाट बचाउन आफू सधैँ नजिक रहनेछु भनी महसुस गराउनु बुबाको जिम्मेवारी हो ।
दुनियाँ देखाउनु
बुवा एउटा ठुलो झ्याल जस्तै हुनुपर्छ जसले बच्चाहरूको अगाडि पूरा दुनियाँ खोल्न सक्छन् । बालबालिका आफ्ना बुवाको दृष्टिकोणले पूरा दुनियाँसँग परिचित हुन्छन् र पिताले उनीहरूलाई राम्रो मार्गदर्शन गर्न सक्छन् ।
निःशर्त प्रेम
बुवाको जिम्मेवारी उनीहरूलाई मार्गदर्शन गर्ने वा ज्ञान दिने मात्र होइन, बुबाले आफ्नो मायाले बच्चाहरूको मनोबल बढाउने पनि काम गर्न सक्छन् । त्यसैले बच्चालाई निःशर्त प्रेम गर्नुहोस् ।
पार्टनर प्रति माया र सम्मान देखाउनु
बुवाले आफ्नो जीवनसाथीलाई माया र आदर देखाएपछि बच्चाले पनि आफ्नी आमा र घरका अन्य सदस्यप्रति सम्मान देखाउन सिक्छन् । बुवाले कहिल्यै पनि आफ्नो बच्चाकी आमालाई अपमान गर्नुहुँदैन । एउटा बुवाले आफ्नो सन्तानका लागि गर्ने सबैभन्दा ठुलो कुरा भनेको उनकी आमालाई माया गर्नु पनि हो ।
गुणस्तरीय समय व्यतीत गर्नु
बच्चाका लागि त्यो पल स्मरणीय हुन्छन् जब बुवाले आफ्ना बच्चासँग गुणस्तरीय समय बिताउँछन् । तपाईंले बच्चासँग कति समय बिताउनुहुन्छ, त्यो फरक पर्दैन, तपाईंले बच्चासँग गुणस्तरीय समय कति बिताउनु भयो भन्ने कुरा महत्त्वपूर्ण हुन्छ ।
