– हिरालाल आचार्य ‘डायमण्ड’
चितवन, वैशाख १६ –
राप्ती नगरपालिका ३ की २३ वर्षीय सुजिता भण्डारीको मृत्यु प्रकरणमा आत्महत्या दुरूत्साहन मुद्दा खेपिरहेका सचिन भनिने सुकदेव भण्डारीले सफाइ पाएका छन् ।
जिल्ला न्यायाधीश अवनी मैनाली भट्टराईको इजलासले बिहीबार उनलाई सफाइ दिएको जिल्ला अदालतका श्रेस्तेदार इश्वर आचार्यले चितवन आजलाई जानकारी दिए ।
सुजितालाई आत्महत्या गर्न बाध्य पारिएको भन्दै आमा अम्बिका भण्डारीले जिल्ला प्रहरी कार्यालय चितवनमा सुकदेवविरुद्ध मुद्दा दर्ता गरेकी थिइन् । आत्महत्या दुरूत्साहन मुद्दा लागेका सचिन भण्डारीसँग चितवन अदालतले ०७८ साउन ३२ गते ५० हजार धरौटी माग गरेको थियो । धरौटी बुझाउन नसकेर उनी कारागार चलान भएका थिए ।
झापाको झापा गाउँपालिका– ६ शरणमतिका २३ वर्षीय सुकदेव र सुजिता नाताले दाजु बहिनी पर्छन् । उनीहरुबीच विवाह गर्ने सम्मको तयारी भएको खुलेको थियो । काठमाडौंमा रहँदा बस्दा दाजुबहिनीबीच गहिरो प्रेम सम्बन्ध रहेको र बहिनीले असार ९ गते बिहे गर्न भनेकोमा आफूले हुन्न भनेको सचिनले अदालतमा बयान दिएका थिए ।
परिवार स्रोतका अनुसार सुजिता ०७८ साल असार ११ गतेदेखि बेपात्ता भएकी थिइन् । असार ११ गते बिहान ६ बजे साथीको घर जाने भनेर हिँडेकी थिइन् सुजिता । उनले सोही दिन १२ बजे दिदीलाई फोन गरेर अपहरणमा परेको बताएकी थिइन् । त्यसलगत्तै परिवारले प्रहरीलाई खबर गरेको थियो ।
तर १० दिनसम्म पनि प्रहरीले सुजिताको बारेमा पत्ता लगाउन सकेन । असार २० गते आइतबार साँझ ब्रह्मास्थानी सामुदायिक वनमा च्याउ टिप्न गएका स्थानीयले एक युवतीको शव देखे । शव देखेपछि स्थानीयले प्रहरीलाई खबर गरे । प्रहरी र सुजिताको परिवार पुगेपछि शव सुजिता कै भएको पुष्टि भएको थियो । वनको बीचमा एउटा झाङमा अड्किएको अवस्थामा उनको शव फेला परेको थियो । उक्त वन सुजिताको घरभन्दा करिव ५ किलोमिटरको दुरीमा रहेको छ ।
हराएको १० दिनसम्म पनि प्रहरीले घटनाबारे केही अनुसन्धान गर्न नसकेको भन्दै स्थानीयहरु प्रहरी प्रशासनविरुद्ध खनिँदै नाराबाजी गर्दै राप्ती नगरपालिका ३ क्षेत्रको पूर्वपश्चिम राजमार्ग समेत अवरुद्ध गराएका थिए । लामो समयसम्म राजमार्ग अवरुद्ध गराएपछि चितवन प्रशासनले स्थानीयसँग सम्झौता गरी राजमार्ग खुलाइएको थियो । त्यसपछि प्रहरीले सुजिताको शव पोष्टमार्टमका लागि काठमाडौं पठाएको थियो ।
पोस्टमार्टम रिर्पाेटमा सुजिताको शरीरमा कुनै चोटपटक नलागेको र बलात्कार पनि नभएको उल्लेख छ । यसबाट सुजिताको हत्या गरिएको भन्ने पुष्टि हुने आधार फेला पर्न सकेन । सुजिताको मृत्यु कसरी भयो भन्ने कुरा रहस्यमै रहेका बेला साउन ४ गते देवघाटमा सुजिताको अन्त्येष्टी गरियो ।
त्यसपिछ सुजिताले आत्महत्या गरेको र त्यसका लागि सुकदेवले दुरुत्साहन गरेको भन्दै सुकदेव विरुद्ध सुजिताकी आमाले मुद्दा दर्ता गरेकी थिइन् । अहिले सुकदेवले सफाइ पाइसकेका छन् । सुजिताको मृत्यु प्रकरणमा सुकदेवले आत्महत्या गर्न दुरुत्साहन गरेको नपाइएपछि उनलाई सफाइ दिइएको हो ।
