चितवन, बैशाख १० –
चितवन र नवलपुरका पानी उद्योगीहरु मिलेर भरतपुरको क्षेत्रपुरमा सीएन वाटर टेस्टिङ्ग एण्ड एनालाइसिस ल्याब खोलेका छन् ।
उक्त ल्याबको आज शनिबार खाद्य प्रविधि तथा गुण नियन्त्रण विभागकी महानिर्देशक डा मतिना जोशी वैद्यले उद्घाटन गरिन् ।
ल्याबको उद्घाटन गर्दै महानिर्देशक वैद्यले चितवन र नवलपुरमा रहेका पानी उद्योगीहरु एकबद्ध भएर गुणस्तरीयता कायम गर्न लाग्नु भनेको एकदमै राम्रो कामको सुुरुवात भएको बताइन् । यसरी उत्पादनमा स्वच्छता कायम गर्न उद्योगीहरु नै स्वयम लाग्दै जानुपर्ने बताउँदै उनले सरकारले मात्र नियमन गरेर खाद्य स्वच्छता कायम गर्न संभव नहुने धारणा राखिन् ।
‘सरकारको तर्फबाट मात्र मुद्दा मामिला गरेर स्वच्छता कायम गर्नु प्राय असंभव हुन्छ, उनले भनिन्, ‘यसमा तीन वटै पक्षको भूमिका हुन्छ । सुरुमा उद्यमी व्यावसाय त्यसपछि सरकार जो नियमन कर्ताको रुपमा रहेको हुन्छ र त्यसपछि उपभोक्ता ।’
खाद्य परीक्षण तथा गुण नियन्त्रण कार्यालय चितवनका प्रमुख एवम् खाद्य विज्ञ घननाथ अधिकारीले सीएन ल्याब पानी उद्योगीहरुले स्वनियमनको लागि खोलेको बताए । पानी प्रशोधन सम्बन्धी निर्देशिका अनुसार नै चितवन र नवलपुरका उद्योगीहरुले खोलेको उनको भनाइ छ ।
‘खाद्य स्वच्छता कायम गर्न ल्याबमा विभिन्न परीक्षण गर्नुपर्ने हुन्छ जसका लागि यो ल्याब निर्माण भएको छ’ उनले भने्, ‘यस क्षेत्रमा पानीमा गुणस्तर कायम गर्न ठूलो भूमिका खेल्छ ।’
अधिकारीका अनुसार ४/४ महिनामा पानी उद्योगीहरुले नेपाल सरकारले तोकेको प्रयोगशालामा परीक्षण गर्नुपर्छ । जसका लागि चितवनबाट उद्योगीहरु हेटौंडा र नवलपुरबाट उद्योगीहरु भैरहवा जानुपर्छ । ‘यो ल्याब निर्माण भएपछि पानी उद्योगीहरुले प्रत्येक ब्याचको पानी परीक्षण गर्नुहुन्छ र नेपाल सरकारको निर्देशिका अनुसार तोकिएको स्थानमा गएर पनि परीक्षण गर्नुहुन्छ, उनले भने, ‘यो ल्याबले गर्दा पानी उद्योगीहरुलाई सेल्फ करेक्सन गर्न र काम गर्दै जाँदा भएका त्रुटीहरुलाई सच्ययाएर अझै राम्रो उत्पादन गर्न सहयोग पुग्छ ।’
ल्याबका अध्यक्ष एवम् नेपाल बोटलर वाटर उद्योग संघ चितवन नवलपुरका अध्यक्ष केशव घिमिरेले यसलाई नेपालको एउटा राम्रो ल्याबको रुपमा विस्तार गर्ने लक्ष्य रहेको बताए ।
नेपाल बोटलर वाटर उद्योग संघ चितवन नवलपुरका वरिष्ठ उपाध्यक्ष सोमप्रसाद काफ्रीले पानी उद्योगीहरुले उद्योगमा आफैले पनि परीक्षणका लागि ल्याब राख्नुपर्ने बाध्यता बनेको बताउँदै उनले सबै उद्योगमा ल्याब राख्न केमिकल स्टोरेज र लगानीका कारण संंभव नहुने हुँदा सबै मिलेर संयुक्त ल्याब खोलिएको बताए ।
उनले चितवन नवलपुरका सबै पानी उद्योग २७ वटा उद्योग मिलेर २५/३० लाखको लगानीमा ल्याब निर्माण गरिएको बताए ।
उनले भने, ‘०७४ सालमा निर्देशिका जारी हुँदै गर्दा पहिलो चरणमा अटोमेटिक पलान्ट लगाउने भन्ने थियो । सुरुमा त्यो गर्यौं र दोश्रो चरणमा संयुक्त ल्याब निर्माण गरेका छौं ।’
अहिले तत्काल पानी परीक्षण भए पनि पछि गएर कुखुरालाई खुवाउने पानी र स्विमिङ पुलको पानी पनि परीक्षण गरिने उनको भनाइ छ ।
