भरतपुर, चितवन –
प्रेसिडेन्सी कलेज अफ म्यानेजमेन्ट एन्ड साइन्सले चितवन क्षेत्रमा उद्यमशीलता विकास गर्ने उद्देश्यले ‘PCMS Business Incubation Program’ सुरु गरेको छ।
यो कार्यक्रम नयाँ उद्यमीहरूलाई सल्लाह, तालिम, मार्गनिर्देशन र व्यवहारिक अभ्यासमार्फत सहयोग पुर्याउने लक्ष्यका साथ ल्याइएको हो।
कलेजले यो कार्यक्रम औद्योगिक उद्यम विकास संस्थान (IEDI) र प्राविधिक साझेदार द इन्क्युबेटर एकेडेमी (अन्त्रप्रेरणा, बृद्धि र केजीएस इन्क्स) को सहकार्यमा सञ्चालन गरिरहेको यस प्रेसिडेन्सि इन्कुबेसन कार्यक्रमका कार्यक्रम सन्चालक श्री सुशील भट्टराईले सहभागीहरूलाई यस अवसरको पूर्ण सदुपयोग गर्न प्रोत्साहित गरेका छन्। कलेजका प्रिन्सिपल श्री शम्भु छेत्रीले कक्षाकोठाको पढाइभन्दा बाहिर उद्यमशीलतालाई बढावा दिन कलेज प्रतिबद्ध रहेको बताए।
गत २८ मे (११ जेठ २०८२) देखि यस कार्यक्रमको सुरुवात चारदिने ‘IDEA Validation Camp’ बाट भएको हो। यस बुटक्याम्पमा आठ जना चुनिएका उद्यमीहरूले सहभागिता जनाएका थिए। उनीहरूलाई व्यवहारिक अभ्यास र वास्तविक परिस्थितिमार्फत आफ्नो व्यापारिक धारणा प्रस्फुटन गर्ने मौका दिइएको थियो।
उक्त सत्रको सहजीकरण श्रद्धा शाक्य (व्यापार बृद्धि विकल्पकी सहसंस्थापक), श्री सुशील भट्टराई (प्रेसिडेन्सी कलेजका बीबीए निर्देशक) र श्री सनिल तुलाधर (केजीएस इन्क्स र व्यापार बृद्धि विकल्प) ले गरेका थिए।
बुटक्याम्पपछि कार्यक्रमको अर्को चरण ‘इन्क्युबेसन चरण’ सुरु हुनेछ। यस चरणमा सहभागीहरूले मास्टरक्लास र बिजनेस कोचिङ सत्रमार्फत आफ्ना व्यवसायलाई थप निखार्नेछन्। सहभागीहरूलाई उनीहरूको उद्यम विकासका लागि व्यक्तिगत मार्गनिर्देशन पनि प्रदान गरिनेछ।
कार्यक्रमको समापन आगामी २०८३ असारको पहिलो हप्ता ‘डेमो डे’ को रूपमा हुनेछ। सो दिन सहभागीहरूले आफ्ना व्यवसायिक योजना, सिकाइ र उपलब्धि सार्वजनिक रूपमा प्रस्तुत गर्नेछन्। उक्त कार्यक्रममा सल्लाहकार, लगानीकर्ता, व्यवसायी तथा सर्वसाधारणको सहभागिता रहनेछ। यसले सहभागीहरूको उद्यमशील यात्रालाई मात्र नभई उनीहरूको मेहनत र प्रगतिलाई समेत उजागर गर्ने लक्ष्य राखेको छ।
