– हिरालाल आचार्य ‘डायमण्ड’
चितवन, जेठ २ –
निउरो टिप्न जाँदा बाघको आक्रमणमा परेर रेखा बस्नेतको मृत्यु भएपछि यतिखेर पश्चिम चितवनको मेघौलीमा सन्नाटा छाएको छ ।
भरतपुर महानगरपालिका २७ मेघौलीकी पूर्व म्यादी प्रहरी समेत रहेकी २३ वर्षीया रेखालाई आज बिहान बाघले बेपत्ता बनाएको थियो । स्थानीय राधाकृष्ण मध्यवर्ती सामुदायिक वनमा बस्नेतसहित ९–१० जना महिला निउरो टिप्न जाँदा बाघले आक्रमण गरेको हो । रेखासहितको टोली बिहान ७ बजेतिर जंगल गएको थियो । साढे ८ बजेतिर बाघले रेखालाई आक्रमण गरेको थियो भने अरु भागेर ज्यान बँचाउन सफल भए ।
बेपत्ता रेखाको शव खाज्दै जाँदा बाघले आक्रमण गरेको स्थानको ३०० मिटर जंगलभित्र रेखाको शव फेला परेको जिल्ला प्रहरी कार्यालय चितवनले जनाएको छ ।
बस्नेतलाई बाघले खाइरहेको अवस्थामा देखेपछि नेपाली सेनाको टोलीले ५ राउण्ड हवाई फायर गरेर बाघलाई धपाएको थियो । बस्नेतको टाउको र छातिको भाग बाघले खाईसकेको अवस्थामा शव फेला पारिएको जिल्ला प्रहरी कार्यालय चितवनले जनाएको छ ।
शव फेला पारेपछि केही समय स्थानीयले शव उठाउन दिएका थिएनन् । बाघलाई डार्ट गरेर नियन्त्रणमा लिने सहमतिपछि स्थानीयले शव उठाउन दिएका छन् । प्रहरीले अहिले शव पोष्टमर्टमका लागि भरतपुर अस्पताल लगेको छ ।
चितवनमा पछिल्लो समय बाघ आतंक नै मच्चिएको छ । पछिल्लो तीन महिनामा मात्र चितवनमा बाघको आक्रमणबाट १० जनाले ज्यान गुमाइ सकेका छन् ।
