२९ बैशाख,काठमाडौ –
नेकपा एमालेका सांसद क्षितिज थेबेले पछिल्लो समय मुलुकमा मुद्रास्फीति र ब्याजदरबीचको सन्तुलन बिग्रिएको भन्दै सरकार र नेपाल राष्ट्र बैंकको ध्यानाकर्षण गराएका छन् । प्रतिनिधिसभाको उद्योग तथा वाणिज्य र उपभोक्ता तथा श्रम समितिको बैठकमा बोल्दै सांसद थेबेले निक्षेपकर्ताले बैंकमा पैसा राख्दा नै घाटा व्यहोर्नुपर्ने अवस्था सिर्जना भएको बताएका हुन् ।
उनले नेपाल राष्ट्र बैंकले सार्वजनिक गरेको चैत मसान्तसम्मको तथ्यांक उल्लेख गर्दै मुलुकको औसत मुद्रास्फीति दर ४.४७ प्रतिशत पुगेको तर वाणिज्य बैंकहरूले निक्षेपमा दिने भारित औसत ब्याजदर भने ३.४० प्रतिशत मात्रै रहेको बताए ।
‘यसको अर्थ निक्षेपकर्ताले वार्षिक १.०७ प्रतिशतका दरले घाटा बेहोर्नुपरेको छ,’ थेबेले समितिमा भने, ‘वास्तविक ब्याजदर ऋणात्मक हुँदा सर्वसाधारणको क्रयशक्ति घटिरहेको छ ।’
उनले मुद्रास्फीति भन्दा ब्याजदर कम हुँदा सर्वसाधारणमा बैंकमा बचत गर्ने उत्साह घट्ने र निक्षेप झिक्ने प्रवृत्ति बढ्न सक्ने चेतावनी दिए ।
‘निक्षेपकर्ताले बैंकबाट पैसा निकाल्न थाले भने बैंकहरूले केबाट कर्जा दिने ? भोलि महाविपत्ति आउन सक्छ,’ उनले भने ।
सांसद थेबेले सरकार र राष्ट्र बैंकले तत्काल निक्षेपकर्तालाई संरक्षण गर्ने नीति ल्याउनुपर्नेमा जोड दिए । उनले निक्षेपको ब्याजदर यथोचित रूपमा बढाउने, बजारमा बढ्दो महँगी नियन्त्रण गर्ने तथा वित्तीय स्थायित्व कायम राख्ने उपाय तत्काल अवलम्बन गर्न आग्रह गरे ।
उनका अनुसार यदि समयमै आवश्यक कदम चालिएन भने बैंकिङ प्रणालीमा दबाब सिर्जना भई समग्र अर्थतन्त्रमा नकारात्मक असर पर्न सक्ने खतरा बढ्नेछ ।
