चितवन,मंसिर २१-
बिरेन्द्र बहुमुखी क्याम्पसका युवा नेतृत्व बिनय आचार्यले लमजुङका २१ वर्षीय बिस्वराज अधिकारीको उपचारका लागि क्याम्पसमै सहयोग अभियान सुरु गरेका छन्। Severe Aplastic Anemia बाट ज्यानज्यानै जोगाइरहेका अधिकारी हाल त्रिवि शिक्षण अस्पताल, महाराजगञ्जमा उपचाररत छन्। चिकित्सकले छिट्टै Bone Marrow Transplantation गर्नुपर्ने अवस्था आएको जनाएको छ, जुन नेपालको सामान्य परिवारका लागि अत्यन्तै खर्चिलो प्रक्रिया हो।
अधिकारीको परिवारले अहिले सम्म करिब ८०–९० लाख खर्च गरिसकेको छ। आर्थिक भार झेल्न नसक्ने अवस्था आएपछि बिनय आचार्यले व्यक्तिगत पहलमा क्याम्पसका विद्यार्थी, स्थानीय समुदाय र सामाजिक अभियन्तासँग समन्वय गरेर सहयोग अभियान विस्तार गरेका छन्।
आचार्यले भने, “एक जना युवकको जीवन यति ठूला खर्चका कारण जोखिममा परिरहेको छ। हामीले बस हेर्न मिल्दैन। सबैले सानो–सानो सहयोग गरे पनि ठूलो परिवर्तन ल्याउन सकिन्छ।”
उनको नेतृत्वमा सुरु गरिएको यो अभियानले क्याम्पसका सयौं विद्यार्थीलाई मानविय सहयोगमा जोड्दै छ। अभियानले सामाजिक सञ्जालदेखि क्याम्पसका कक्षाकोठासम्म सक्रियता बढाएको छ।
अधिकारीको उपचारका लागि आर्थिक सहयोग, हौसला र शेयरहरू परिवारका लागि अत्यन्तै महत्वपूर्ण मानिएको छ।
