काठमाडौँ, मङ्सिर ४ –
गृहमन्त्री रमेश लेखकले देशमा शान्ति सुरक्षासँगै अनुशासन कायम गराउन आवश्यक भएको बताएका छन् । कैलालीको धनगढीमा आयोजित सुरक्षा गोष्ठीमा उनले भने, ‘मुलुकको पहिलो आवश्यकता शान्ति स्थापना गराउनु भएपनि अनुशासन पनि कायम गराउन जरुरी छ ।
मंगलबारबाट धनगढीमा प्रदेश स्तरीय गोष्ठी सुरु भएको छ । मन्त्री लेखकले मङ्सिर १६ मा हुने स्थानीय तह उप निर्वाचनलाई निष्पक्ष र शान्तिपूर्ण तरिकाले सम्पन्न गराउने वातावरण बनाउन सुरक्षा निकायलाई निर्देशन दिएका छन् । उनले भने, ‘लोकतन्त्रको विकल्प लोकतन्त्र मात्रै हो, यसको रक्षा र सुदृढीकरण हामी सबैको दायित्व हो ।’
लोकतन्त्र मर्यादित व्यवस्था भएको हुनाले लोकतन्त्रमा अनुशासन अनिवार्य रहेको उनले बताए । गृहमन्त्रीले सीमा नाकामा हुने राजस्व चुहावट, लागुऔषध नियन्त्रण, आत्महत्या, विपद् र सवारी दुर्घटना नियन्त्रणमा गम्भीर भएर काम गर्न निर्देशन दिएका छन् । सुरक्षा अधिकृतहरूलाई उनले भने, ‘अहिले गरिरहेको कामले मात्र पुगेन, थप सक्रिय भएर काम गर्नुस् ।’ सुरक्षा गोष्ठीमा सुदूर पश्चिमा ९ जिल्लाका सुरक्षा प्रमुखहरू, प्रमुख जिल्ला अधिकारीहरू, गृह मन्त्रालय सचिव र तीनवटै सुरक्षा निकायका प्रमुखहरू सहभागी छन् ।
