भरतपुर, फागुन १४
चितवनका ५ वटा जेसिजहरुको संयुक्त आयोजनामा सोमबार एक दिने बैठक प्रणाली तालिम सम्पन्न भएको छ ।
नारायणगढ जेसिज, विसहजार जेसिज, कालिका जेसिज, नारायणगढ लेडी जेसिज र माडी जेसिजको संयुक्त आयोजनामा संचालित सो तालिममा ५३ जना प्रशिक्षार्थीहरुको सहभागिता रहेको थियो ।
भरतपुर ११ स्थित धावन पार्टी प्यालेसमा आयोजित उक्त तालिममा नेपाल जेसिजका पुर्व कार्यकारीणी उपाध्यक्ष एवं शिव प्रसाद भुषाल प्रमुख प्रशिक्षक रहनु भएको थियो । तालिमको उद्घाटन तथा समापन कार्यक्रममा नेपाल जेसिज वर्ष २०२१ का राष्ट्रिय अध्यक्ष अरुणेश्वर खनाल प्रमुख अतिथी रहनु भएको थियो ।
कार्यक्रममा बोल्दै प्रमुख अतिथी खनालले राजनीतिक दलहरुले युवाहरुको मुल्यमान्यता घटाएको वताउँदै त्यसलाई परिपुर्ती गर्नका लागि जेसिज युवाहरुले तालिम मार्फत युवाहरुको महत्व वढाउनु आजको आवश्यकता भएको वताउनु भयो ।
विसहजार जेसिजका अध्यक्ष लक्ष्मण अधिकारीको अध्यक्षतामा सम्पन्न तालिम कार्यक्रममा नारायणगढ जेसिजका अध्यक्ष राजेन्द्र भट्टराई, नारायणगढ लेडी जेसिजकी अध्यक्ष हिमा श्रेष्ठ, कालिका जेसिजकी अध्यक्ष सुमित्रा अधिकारी, माडी जेसिजका अध्यक्ष सन्तोष भट्टराई, नेपाल जेसिज वर्ष २०२४ का राष्ट्रिय उपाध्यक्ष अमर घिमिरेलगायतले बोल्नु भएको थियो ।
















