चितवन, ०९ पुस
नारायणगढ–बुटवल सडक खण्डमा आजदेखि राष्ट्रिय स्वतन्त्र पार्टी (रास्वपा)ले पैदलयात्रा सुरु गरेको छ । पैदल यात्रा आज बिहान ९ बजे चितवनको नारायणगढ पुल्चोकबाट सुरु गरिएको हो ।
यात्रामा पार्टी सभापति रवि लामिछानेसहित, पार्टीका नेता, सांसद, कार्यकर्ता सहभागी हुने बताइएको छ । दबाब यात्रामा सहभागी हुनेहरुलाई पार्टीको झण्डा, लोगो, टि–सर्ट लगायतका कुनै पनि सामग्री प्रयोग नगर्न रास्वपाले आग्रह गरेको छ ।
नारायणगढदेखि बुटवलसम्म ११३ किलोमिटर दुरीको पैदलयात्रा तीन दिनमा सक्ने रास्वपाले जनाएको छ ।
नारायणगढ–बुटवल सडक खण्ड विस्तारको कामलाई तीव्रता दिन सरकारको ध्यानाकर्षण गराउने उद्देश्यले पैदल यात्रा सुरु गरिएको पार्टीका केन्द्रीय सह-कोषाध्यक्ष दिपक बोहोराले जानकारी दिए।
