चितवन, वैशाख ४ –
भरतपुर महानगरपालिका–९ स्थित गुरुकुल कलेजले एसइई परीक्षा सकेर फुर्सदमा रहेका विद्यार्थीलाई लक्षित गर्दै ‘गुरुकुल एसइई फुटसल कप’ आयोजना गर्ने भएको छ।
कलेजले शुक्रबार पत्रकार सम्मेलन गर्दै यही वैशाख ९ देखि ११ गतेसम्म प्रतियोगिता सञ्चालन हुने जानकारी दिएको हो। प्रतियोगिता कलेज परिसरमै निर्माण गरिएको अन्तर्राष्ट्रिय स्तरको फुटसल मैदानमा सञ्चालन गरिनेछ।
कलेजका प्लसटु विज्ञान कार्यक्रम संयोजक हरिहर भुसालका अनुसार विद्यार्थीलाई अनुशासित र अध्ययनप्रति थप लगनशील बनाउन अतिरिक्त क्रियाकलाप आवश्यक हुने भएकाले फुटसल प्रतियोगिता आयोजना गरिएको हो। “विद्यार्थीका लागि विद्यार्थीमैत्री खेलकुद गतिविधि आवश्यक छ,” उनले बताए।
प्रतियोगितामा प्रत्येक टिमबाट तीन जना वैकल्पिक खेलाडी सहित आठ जनासम्म सहभागी हुन पाउनेछन्। सहभागी हुनका लागि विद्यालयको परिचयपत्र अनिवार्य गरिएको छ।
प्रतियोगिताका विजेताले १५ हजार रुपैयाँ र उपविजेताले १० हजार रुपैयाँ पुरस्कार प्राप्त गर्नेछन्। त्यस्तै उत्कृष्ट स्कोरर, उत्कृष्ट गोलकर्ता र उत्कृष्ट खेलाडीले जनही २ हजार रुपैयाँ, मेडल र प्रमाणपत्र पाउनेछन्।
प्रतियोगितामा सहभागिता जनाउन इच्छुक टोलीले वैशाख ७ गतेसम्म दर्ता गर्नुपर्ने कलेजले जनाएको छ। गुरुकुल कलेजले यसअघि पनि विद्यार्थी लक्षित विभिन्न अतिरिक्त कार्यक्रम सञ्चालन गर्दै आएको छ। टिम दर्ता अनलाइन र गुरुकुल कलेजमा उपस्थित भएर दुबै तरिकाबाट गर्न सकिन्छ ।
