हेटौंडा, माघ २२-
बागमती प्रदेशसभाको आज अपराह्न बसेको बैठकमा शून्य समयमा बोल्नुहुने प्रदेशसभा सदस्यहरूले प्रदेशमा राष्ट्रिय सरोकारको विषयलगायत किसानले उत्पादन गरेको तरकारीले बजारमा उचित मूल्य नपाउँदा आइपरेको समस्यालाई दीर्घकालीन रूपमा समाधान गर्न प्रदेश सरकारको ध्यानाकर्षण गराएका छन् ।
सत्तापक्ष र प्रतिपक्ष गरी १७ सदस्यले आआफ्नो क्षेत्रको समस्या समाधानका लागि सरकारलाई ध्यानाकर्षण गरी कार्यान्वयन गर्न आग्रह गरे । उउनीहरुले किसानले उत्पादन गरेको मौसमी तरकारीले बजारबाट उचित मूल्य पाउन नसक्दा किसानले आर्थिक सङ्कट बेहोर्न परेको बताए ।
छिमेकी देशबाट आयात भई आएको तरकारी बजारमा सस्तो मूल्यमा बिक्री वितरण हुँदा कृषकले उत्पादन गरेको तरकारी स्थानीय उपभोक्ता समक्ष पु¥याउन नसकिएकाले प्रदेश सरकारले गम्भीररूपमा सङ्घीय सरकारमार्फत बाहिरबाट आउने तरकारीलाई बन्देज लगाउन माग गरे ।
उनीहरुले किसानले उत्पादन गरेको तरकारी बजारमा खपत नहुँदा कृषक ठूलो आर्थिक सङ्कटमा परेकाले प्रदेश सरकारले केही हदसम्म भए पनि क्षतिपूर्ति उपलब्ध गराइदिन आग्रह गरे । बैठकमा दोलखा जिल्लामा हालै भएको आगलागीका पीडित परिवारलाई उद्धार गरी राहतस्वरूप आर्थिक अनुदान उपलब्ध गराउन आग्रह गरे ।
किसानले लगाउने मौसमी खाद्यान्न तरकारीलगायत फलफूललाई पनि आवश्यक पर्ने मलखादको उपलब्ध गराउन र किसानले उत्पादन गरेको मौसमी तरकारीलाई शीतभण्डारमा राख्ने व्यवस्था मिलाउन उनीहरुले माग गरे ।
सदस्यहरूले काठमाडौँलगायत विभिन्न जिल्लामा सडकको विस्तार, मर्मत सम्भार गर्न, सर्वसाधारणलाई गुणस्तरीय स्वास्थ्य सेवा प्रदान गर्न र पिउने पानी उपलब्ध गराउन गुरु योजना तर्जुमा गरी कार्यान्वयनमा ल्याउन आग्रह गरे ।
सदस्यहरूले प्राकृतिक सम्पदा एवं वन क्षेत्रलाई संरक्षण गर्न स्थानीय निकायलाई प्रभावकारी ढङ्गबाट परिचालन गर्न र जङ्गल फँडानी गर्ने व्यक्तिलाई दण्डित गर्नुका साथै वृक्षरोपणको अभियानलाई घरदैलोमा पु¥याउन जनपरिचालन गर्न सरकारसँग माग गरे ।
