चितवन, जेठ २ –
आदर्श गृह नेपालको १८ औँ वार्षिक साधारणसभा सम्पन्न भएको छ। आज (शनिबार) भरतपुर ४ स्थित आदर्श गृह नेपालको सभाहलमा साधारणसभा सम्पन्न गरिएको हो। कार्यक्रममा संस्थाको वार्षिक प्रगति प्रतिवेदन, आर्थिक प्रतिवेदन तथा आगामी वर्षको कार्ययोजना प्रस्तुत गरिएको थियो।
संस्थापक एवं अध्यक्ष मिना कुमारी खरेलको अध्यक्षतामा सम्पन्न कार्यक्रममा प्रमुख अतिथि भरतपुर महानगरपालिकाका कार्यवाहक मेयर चित्रसेन अधिकारी रहेका थिए। कार्यक्रममा बोल्दै मेयर अधिकारीले संस्थाले समाजसेवा, बाल संरक्षण, महिला सशक्तीकरण तथा समुदायस्तरमा पुर्याएको योगदानको प्रशंसा गर्दै संस्थाको पारदर्शिता, उत्तरदायित्व र सामाजिक अभियानलाई अझ प्रभावकारी बनाउन सुझाव दिएका थिए।
सो अवसरमा उनले लामो समयदेखि भाडाको घरमा बसेर बालबालिकाको सेवा गर्दै आएको आदर्श गृह नेपाल अब आफ्नै भवन निर्माणको तयारीमा रहेको उल्लेख गर्दै स्थानीय सरकारले समेत सहयोग गर्नुपर्ने आवश्यकता महसुस गरेको बताए। साथै उनले भरतपुर महानगरपालिकाको तर्फबाट ३० लाख रुपैयाँ बजेट विनियोजन गर्ने घोषणा समेत गरे।
कार्यक्रमका विशिष्ट अतिथि भरतपुर महानगरपालिका वडा नं. १५ का वडा अध्यक्ष कृष्ण देवकोटाले आदर्श गृहले लामो समयदेखि महिला तथा बालबालिकाको संरक्षणमा उदाहरणीय कार्य गर्दै आएको बताए।
कार्यक्रममा संस्थापक अध्यक्ष मिना कुमारी खरेलले स्वागत मन्तव्य व्यक्त गर्दै संस्थाले विगतदेखि नै सामाजिक क्षेत्रमा निरन्तर काम गर्दै आएको र आगामी दिनमा समेत सेवा कार्यलाई थप विस्तार गर्ने प्रतिबद्धता व्यक्त गरिन्। उनले २०४९ सालमा किशोरी अवस्थादेखि नै समाजमा केही सकारात्मक काम गर्ने उद्देश्यले ‘आदर्श नारी क्लब’ स्थापना गरेको स्मरण गरिन्।
खरेलका अनुसार २०६६ सालदेखि संस्थाले औपचारिक रूपमा लैंगिक हिंसा, मानव बेचबिखन तथा ओसारपसार, द्वन्द्व प्रभावित, जबरजस्ती करणी, घरेलु हिंसा लगायतका विभिन्न हिंसाबाट प्रभावित तथा जोखिममा रहेका महिला र बालबालिकाको उद्धार, पुनर्स्थापना, मनोसामाजिक परामर्श, कानुनी सहायता, शिक्षा, सीपमूलक तथा आयमूलक तालिममार्फत आत्मनिर्भर बनाउने कार्य गर्दै आएको छ।
उनले विभिन्न दाताहरूको सहयोगमा संस्था निरन्तर सञ्चालन हुँदै आएको जानकारी दिँदै हालसम्म पनि संस्थाले भाडाको घरबाट सेवा प्रवाह गरिरहेको बताइन्। महिला र बालबालिकालाई छुट्टाछुट्टै व्यवस्थापन गर्नुपर्ने आवश्यकतालाई ध्यानमा राख्दै २०८१ चैत २८ गते भरतपुर महानगरपालिका वडा नं. १५ स्थित विश्वप्रकाश टोलमा ४ कठ्ठा जग्गा खरिद गरी भवन निर्माण कार्य सुरु गरिएको जानकारी दिइन्। भवन निर्माण सम्पन्न गर्न सबै क्षेत्रबाट सहयोगको अपेक्षा गरिएको उनको भनाइ थियो।
धारणसभामा आदर्श टोल विकास संस्थाका अध्यक्ष माधव लम्साल तथा भरतपुर महानगरपालिका वडा नं. ४ का वडा सदस्य ठाकुरप्रसाद सापकोटाले संस्थाले हालसम्म गरेका काम र निर्माणाधीन भवनको विषयमा मन्तव्य व्यक्त गरेका थिए। ठाकुरप्रसाद सापकोटाले मन्तव्य राख्दै भवन निर्माणका लागि १ धुर भुमी दान दाता भन्ने घोषणा गरे ।
कार्यक्रममा २०८१ सालको एसईई परीक्षामा उत्कृष्ट अंकसहित उत्तीर्ण भएका आदर्श गृहका तीन जना बालिकालाई सम्मान गरिएको थियो। साथै आर्थिक वर्ष २०८२/८३ का लागि प्रस्तावित कार्यक्रमहरू संस्थाका सचिव अर्जुन अधिकारीले प्रस्तुत गरेका थिए।
यस्तै कार्यक्रममा भरतपुर महानगपालिका कार्यपालिका सदस्य सिर्जना अधिकारी, बालकल्याण अधिकारी सुशीला वाग्ले, विभिन्न वडाका अध्यक्ष तथा सदस्य, टोल विकास संस्था, आमा समूह, बालबालिकाको क्षेत्रमा काम गर्ने संघसंस्थाका प्रतिनिधि, आदर्श गृहका पदाधिकारी, सदस्य, संरक्षण सदस्य, आजीवन सदस्य तथा शुभेच्छुकहरूको उपस्थिति रहेको थियो।
संस्थाले हालसम्म १,२२६ भन्दा बढी व्यक्तिको उद्धार, १,१८१ जनाको पारिवारिक पुनर्मिलन तथा २३४ जनालाई कानुनी न्याय दिलाउन सहयोग गरेको जनाएको छ। हाल संस्थामा ३४ जना आश्रित रहेका छन्।
संस्थाले भरतपुर महानगरपालिका वडा नं. १५ कल्याणपुरस्थित ४ कठ्ठा जग्गामा आगामी दुई वर्षभित्र करिब ५ करोड रुपैयाँको लागतमा महिला तथा बालबालिकाका लागि आवश्यक भवन निर्माण गर्ने लक्ष्य राखेको छ। भवन निर्माणका लागि संघ, प्रदेश तथा स्थानीय तहसँग समन्वय भइरहेको र निकट भविष्यमै महायज्ञ सञ्चालन गर्ने तयारीसमेत गरिएको संस्थाले जनाएको छ।
साधारणसभा सम्पन्न भएलगत्तै सामाजिक लेखा परीक्षण कार्यक्रमसमेत आयोजना गरिएको थियो। कार्यक्रममा संस्थाका सचिव अर्जुन अधिकारीले आर्थिक वर्ष २०८१/२०८२ को प्रगति प्रतिवेदन र आर्थिक वर्ष ८२/ ८३ को प्रस्तावित कार्यक्रम पेश गरेका थिए भने कोषाध्यक्ष अनिता तिवारीले आर्थिक वर्ष ८१/८२ को प्रतिवेदन र आर्थिक वर्ष ८२/ ८३ को प्रस्तावित बजेट पेश गरेकी थिईन् । सभाले उक्त प्रतिवेदन सर्वसम्मत रूपमा अनुमोदन गरेको छ।
