काठमाडौं,बैशाख २३-
अपरिचित महिलालाई मोटरसाइकलमा लिफ्ट दिएर एकान्तमा लगी मोबाइल नम्बर माग्ने र नदिएपछि गोप्य अङ्ग देखाएर अश्लील हर्कत गर्ने एक युवकलाई स्याङ्जा प्रहरीले पक्राउ गरेको छ । पक्राउ पर्नेमा स्याङ्जाको पुतलीबजार नगरपालिका वडा नं. १ बस्ने २० वर्षीय दिवस सुनार रहेका छन् ।
जिल्ला प्रहरी कार्यालय स्याङ्जाका सूचना अधिकारी डीएसपी प्रसन्नराज चौधरीका अनुसार हिजो बिहान अन्दाजी ७ः०० बजेको समयमा ती युवकले एक महिलालाई आफ्नो मोटरसाइकलमा लिफ्ट दिएका थिए । पुतलीबजार नगरपालिका १, मलेबगरस्थित सार्वजनिक सडक खण्डको एकान्त स्थानमा मोटरसाइकल रोकेर उनले ती महिलासँग मोबाइल नम्बर मागेका थिए । महिलाले नम्बर दिन अस्वीकार गरेपछि सुनारले आफ्नो शरीरको तल्लो भागमा लगाएको कपडा खोली अश्लील हर्कत (गोप्य अङ्ग प्रदर्शन) गरेका थिए ।
पीडित महिलाले दिएको जाहेरीका आधारमा जिल्ला प्रहरी कार्यालय स्याङ्जाबाट खटिएको विशेष अप्रेसन टोलीले आरोपी सुनारलाई पुतलीबजार क्षेत्रबाटै भाग्दै गरेको अवस्थामा पक्राउ गरेको हो । उनीमाथि आवश्यक कानुनी कारबाहीका लागि थप अनुसन्धान प्रक्रिया अगाडि बढाइएको छ ।
डीएसपी चौधरीका अनुसार सुनारले यसअघि पनि यस्तै प्रकृतिका घटना गराएको प्रारम्भिक अनुसन्धानबाट खुलेको छ । “हामीले प्रारम्भिक अनुसन्धानका क्रममा यी युवकले यस्तै हर्कत पहिले पनि गरेको फेला पारेका छौँ,” डीएसपी चौधरीले भने, “बाँकी अनुसन्धान भइरहेको छ ।” यस प्रकारका घटना सार्वजनिक भएसँगै प्रहरीले सर्वसाधारणलाई विशेष सतर्कता अपनाउन आग्रह गरेको छ । कुनै पनि अपरिचित व्यक्तिले आफ्नो मोटरसाइकल वा सवारीसाधनमा लिफ्ट दिने प्रस्ताव राखेमा सतर्क र सचेत रहन जिप्रका स्याङ्जाले अनुरोध गरेको छ ।
