काठमाडौं मंसिर २८,
परराष्ट्रमन्त्री आरजु राणा देउवा पुस पहिलो साता भारतको भ्रमणमा जाने भएकी छन् । हाल युरोप भ्रमणमा रहेकी परराष्ट्रमन्त्री राणा जर्मनीबाट सिधै भारत भ्रमणमा जाने परराष्ट्र मन्त्रालय स्रोतले बताएको छ ।
उनी ‘इन्डो–नेपाल इकोनोमिक कन्फ्रेन्स’मा सहभागी हुन भारतको नयाँ दिल्ली जान लागेकी हुन् । उक्त कार्यक्रममा उनलाई ‘कि नोट स्पिकर्स’को रूपमा बोलाइएको छ ।
परराष्ट्र मन्त्रालय स्रोतका अनुसार, परराष्ट्रमन्त्री राणा पुस ४ गते नयाँ दिल्ली पुग्नेछिन् । उनी पुस ५ गते नयाँ दिल्लीमा हुने ‘इन्डो–नेपाल इकोनोमिक कन्फ्रेन्स’मा सहभागी हुनेछिन् ।
“नयाँ दिल्लीमा भारतका विदेशमन्त्री एस जयशंकरसँग द्विपक्षीय भेटवार्ताका लागि समय मागेका छौँ । त्यतिबेला भारतीय विदेशमन्त्री विदेश भ्रमण नगए भेटवार्ता हुने सम्भावना छ,” परराष्ट्र मन्त्रालय स्रोतले भन्यो ।
परराष्ट्रमन्त्री राणा पुस ५ वा ६ गते स्वदेश फर्किने छिन् । भारतीय विदेशमन्त्रीसँग भेटवार्ता नहुने भए उनी पुस ५ गते नै स्वदेश फर्किने जनाइएको छ ।
परराष्ट्रमन्त्री भएपछि यसअघि राणाले गत भदौ २ देखि ६ गतेसम्म भारतको भ्रमण गरेकी थिइन् । त्यतिबेला उनले भारतीय समकक्षी जयशंकरसँग द्विपक्षीय वार्ता र प्रधानमन्त्री नरेन्द्र मोदीसँग शिष्टाचार भेटवार्ता गरेकी थिइन् ।
