मोरङ फागुन २३,
कोशी प्रदेश सरकारले सडक पूर्वाधार तथा शहरी विकास मन्त्रालयको नाम परिवर्तन गरेको छ । मन्त्रिपरिषद बैठकले मन्त्रालयको नाम परिवर्तन गरी भौतिक पूर्वाधार विकास मन्त्रालय राखेको छ ।
मन्त्रालयको नाम लामो भएको भन्दै मन्त्री दुर्गाप्रसाद चापागाईले मन्त्रीस्तरीय निर्णय गरेर नाम परिवर्तनका लागि मुख्यमन्त्री तथा मन्त्रिपरिषदको कार्यालयमा पत्राचार गरेका थिए । प्रदेश सरकारले सोही सिफारिस बमोजिम मन्त्रालयको नाम परिवर्तन गरेको हो ।
प्रदेश सरकारको गत २०७८ माघ २३ गते बसेको मन्त्रिपरिषद बैठकले प्रदेशमा १२ वटा मन्त्रालय रहने निर्णय गरेको थियो । सो निर्णयमा भौतिक पूर्वाधार विकास मन्त्रालयलाई विभाजन गरेर तीन वटा मन्त्रालय बनाएको थियो । सडक पूर्वाधार तथा सहरी विकास मन्त्रालय, खानेपानी, सिंचाइ तथा उर्जा मन्त्रालय र यातायात तथा सञ्चार मन्त्रालय बेनका थिए ।
प्रदेशको मुख्यमन्त्रीको जिम्मेवारीमा नेकपा (एमाले) का हिक्मतकुमार कार्की आएपछि मन्त्रालयको संख्या घटाएर नौं कायम गरेका छन् ।
